نومنتخب صدر آصف علی زرداری کو صدارتی پروٹوکول اورسیکیورٹی فراہم کر دی گئی جبکہ ان کا اہم سامان ایوان صدر منتقل کر دیا گیا۔
گزشتہ روز صدارتی الیکشن جیت کر دوسری مرتبہ صدر منتخب ہونے والے آصف علی زرداری آج اپنے عہدے کا حلف اٹھائیں گے۔
آصف علی زرداری واحد سویلین ہیں جو دوسری مرتبہ صدر منتخب ہوئے ہیں، آصف علی زرداری نے 411 الیکٹورل ووٹ حاصل کیے جبکہ ان کے مدمقابل سنی اتحاد کونسل کے نامزد کردہ امیدوار محمود خان اچکزئی کو 180 الیکٹورل ووٹ ملے۔
پاکستان کے 14ویں صدرمملکت کی حلف برداری کی تقریب آج شام 4 بجے ایوان صدرمیں ہوگی، چیف جسٹس قاضی فائز عیسی نومنتخب صدرسے حلف لیں گے۔
حلف برداری کی تقریب میں وزیراعظم شہبازشریف ، چیئرمین جوائنٹ چیف آف سٹاف کمیٹی اور تینوں مسلح افواج کے سربراہان بھی شریک ہوں گے جبکہ مخلف ممالک کے سفیروں کو بھی تقریب میں مدعو کیا گیا ہے۔
ذرائع کے مطابق آصف علی زرداری کو صدارتی پروٹوکول اور سکیورٹی فراہم کر دی گئی ہے، آصف علی زرداری حلف برداری کی تقریب سے قبل ایوان صدر منتقل ہو جائیں گے۔
نو منتخب صدر آصف زرداری کا اہم سامان ایوان صدر منتقل کر دیا گیا ہے، سامان آصف زرداری کی پرسنل سیکرٹری رخسانہ بنگش کی نگرانی میں ایوان صدر منتقل کیا گیا۔
