امریکی کانگریس کے رکن ہنری کیولر اور ان کی اہلیہ امیلڈا پر 6 لاکھ ڈالر کی رشوت کے عوض آذر بائیجان اور میکسیکو کے ایک بینک کے لیے خارجہ پالیسی پر اثر انداز ہونے کا الزام عائد کیا گیا ہے۔
امریکی محکمہ انصاف نے بتایا کہ ہنری کیولر اور امیلڈا نے آذر بائیجان کی حکومت کی ملکیت والی ایک آئل کمپنی اور میکسیکو میں قائم بینک سے مختلف اوقات میں مجموعی طور پر 6 لاکھ ڈالر حاصل کیے۔
ہنری کیولر اور ان کی الیہ پر سازش، مالیاتی فراڈ، وائر فراڈ، منی لانڈرنگ اور دیگر الزامات عائد کیے گئے ہیں۔ انہوں نے کسی بھی بیرونی ادارے کے لیے نمائندے کا کردار ادا کرنے پر ممانعت کے باوجود نمائندگی کی۔
ہیوسٹن کی عدالت میں پیش ہونے پر ہنری اور امیلڈا کیولر کی ضمانت منظور کرلی گئی۔ الزامات ثابت ہونے پر دونوں کو کئی عشروں تک جیل کی سلاخوں کے پیچھے رہنا پڑسکتا ہے۔
