اسلام آباد: اسلام آباد فوڈ اتھارٹی کی جانب سے مارچ 2025 کی کارکردگی رپورٹ جاری کر دی گئی ہے، جس میں ماہ بھر کے دوران مختلف اقدامات اور کارروائیوں کا تفصیل سے ذکر کیا گیا ہے۔
ڈپٹی ڈائریکٹر ڈاکٹر طاہرہ صدیق نے رپورٹ کے اہم نکات پیش کرتے ہوئے بتایا کہ مارچ میں 1400 فوڈ پوائنٹس کی چیکنگ کی گئی، جس میں 181 فوڈ پوائنٹس پر مجموعی طور پر 21 لاکھ 89 ہزار روپے کے جرمانے عائد کیے گئے۔
رپورٹ کے مطابق 11 فوڈ پوائنٹس سیل کیے گئے اور 161 نئے لائسنس بھی جاری کیے گئے۔ رمضان المبارک کے دوران، سحری اور افطار کے اوقات میں فوڈ پوائنٹس کی سخت چیکنگ کی گئی، جس میں 110 سحری اور 307 افطار فوڈ پوائنٹس کی جانچ کی گئی۔
اس دوران، 358 فوڈ سٹالز کا معائنہ کیا گیا اور 1,442 لٹر کولڈ ڈرنکس، 88 کلو گوشت، 76 کلو ایکسپائرڈ اشیاء، 120 لٹر ناقص آئل تلف کیا گیا۔ علاوہ ازیں، 512 کلو ڈیری اشیاء، 280 کلو ممنوعہ ناقص اشیاء اور 560 پیکٹ گٹکا بھی تلف کیے گئے۔
ڈاکٹر طاہرہ صدیق نے مزید بتایا کہ مارکیٹ میں سپلائی ہونے والی اشیاء کے 8 سیمپل لیبارٹری ٹیسٹ کے لیے بھجوائے گئے اور 27 شکایات کا بروقت ازالہ کرتے ہوئے متعلقہ کارروائیاں کی گئیں۔ اس کے علاوہ، 723 فوڈ پوائنٹس کو مزید بہتری کے لیے اصلاحی نوٹس بھی جاری کیے گئے۔
عید کے ایام میں ملاوٹ مافیا کے خلاف سخت کارروائی کی گئی اور اس کی سرگرمیوں کو محدود رکھا گیا۔ ڈاکٹر طاہرہ صدیق نے کہا کہ غیر معیاری اور ممنوعہ اشیاء کی فروخت میں ملوث کاروبار کی ہرگز اجازت نہیں دی جائے گی۔
فوڈ اتھارٹی نے شہریوں کو اپیل کی ہے کہ وہ اشیاء کی خریداری سے قبل ان کی جانچ پڑتال یقینی بنائیں اور صرف منظور شدہ اشیاء استعمال کریں تاکہ صحت کے لیے خطرات سے بچا جا سکے۔
