2013 میں ریلیز کی جانے والی بالی وڈ فلم ‘رانجھنا’ کا افسوسناک انجام مصنوعی ذہانت کے ذریعے تبدیل کرکے اب اسے خوشگوار انداز میں ریلیز کیا جارہا ہے۔
بھارتی میڈیا کے مطابق فلم میں اتنی بڑی تبدیلی کرکے اس کی دوبارہ ریلیز کی خبر نہ تو فلم کے ہدایتکار کو دی گئی اور نہ ہی اداکاروں کو، یہ فلم بھارت کی جنوبی ریاست تامل ناڈو میں یکم اگست کو دوبارہ سنیما گھروں کی زینت بننے جارہی ہے۔
آنند ایل رائے کی ہدایتکاری میں اور ایروس انٹرنیشنل کی پروڈکشن میں بننے والی فلم میں دھنوش اور سونم کپور نے مرکزی کردار نبھائے تھے۔رانجھنا تامل اداکار دھنوش کی ڈیبیو فلم تھی جس کی کہانی ایک ہندو لڑکے کندن (دھنوش) کی گرد گھومتی ہے جو بچپن میں اپنی پڑوس میں رہنے والی مسلمان لڑکی زویا (سونم کپور) سے محبت کر بیٹھتا ہے۔
بعد ازاں کندن کی محبت جوانی تک چلتی ہے لیکن زویا پڑھنے کسی اور شہر جاتی ہے جہاں اسے ایک لڑکے اکرم (ابھے دیول) سے محبت ہوجاتی ہے۔
فلم کے آخری میں کندن کی موت ہوجاتی ہے جب کہ اے آئی سے بنائے گئے اختتام میں کندن کو زندہ دکھایا جائے گا۔
ایروس کے چیف ایگزیکٹو کا بیان
دوسری جانب ایروس کے چیف ایگزیکٹو پردیپ دویدی کا کہنا ہے کہ نیا اختتام فلم کو ایک ’نئے جذباتی زاویے‘ سے پیش کرنے کے لیے شامل کیا گیا ہے تاکہ نئے علاقائی ناظرین کو متوجہ کیا جا سکے۔
ایروس فلم کا ’ اکلوتا اور مکمل حقوق‘ کا مالک ہے اور ہدایتکار رائے، دھنوش اور کپور جیسے تخلیقی افراد نے اپنے معاہدوں میں مستقبل کی کسی بھی ریلیز یا ترمیم میں شرکت کے ’اخلاقی حقوق‘ سے دستبرداری اختیار کر لی تھی۔
ہدایتکار کا بیان
فلم کے ڈائریکٹر آنند ایل رائے نے اس اقدام کو غیر ذمہ دارانہ اور ایک خوفناک، غیر حقیقی تجربہ قرار دیتے ہوئے کہا کہ مجھے چند دن پہلے سوشل میڈیا پرایک اعلان سے اس بات کا پتا چلا، لوگ مجھ سے پوچھ رہے ہیں کہ فلم کے انجام کو کیوں بدلا جا رہا ہے۔
معروف بین الاقوامی فلم انڈسٹری جریدے ’اسکرین‘ سے بات کرتے ہوئے رائے نے کہا کہ نہ مجھ سے اور نہ ہی فلم کے مرکزی اداکاروں سے اس اے آئی تبدیلی سے متعلق کوئی مشورہ لیا گیا یا بتایا گیا۔
انہوں نے بھارتی ٹی وی سے بات کرتے ہوئے کہا کہ رانجھنا کو کسی نئے انجام کی ضرورت نہیں تھی، اس میں خلوص، سچائی تھی، اس کا انجام بغیر کسی مشاورت کے بدل دینا صرف فلم ہی نہیں بلکہ ان مداحوں کے اعتماد کی بھی خلاف ورزی ہے جنہوں نے 12 برسوں سے اسے اپنے دل میں رکھا ہوا ہے۔
