تصور کریں کہ ڈاکٹر لندن میں ہو اور مریض کراچی میں، آپریشن کرنا ہو تو پھر کیا ہوگا؟
یقین کرنا مشکل ہوگا مگر جبرالٹر میں ایک مریض کی زندگی لندن میں موجود سرجن نے آپریشن کے ذریعے بچا لی۔
ایسا روبوٹ روبوٹیک سرجری کے ذریعے ممکن ہوا جس سے مثانے کے کینسر کے شکار 62 سالہ شخص کی زندگی کو بچا لیا گیا۔
جبرالٹر کے سینٹ برنارڈ اسپتال کے آپریشن تھیٹر میں 4 بازؤں والا جدید روبوٹ اس مقصد کے لیے استعمال کیا گیا جس میں ایک 3 ڈی کیمرا نصب کیا گیا تھا۔
اس آپریشن کو 1500 میل دور لندن کے ضلع ہارلے اسٹریٹ میں موجود پروفیسر پروکر ڈسگپتا نے سپروائز کیا۔
وہ لندن کلینک روبوٹیک سینٹر آف ایکسیلینس کے سربراہ ہیں۔
انہوں نے لندن میں ایک کنسول کو استعمال کرتے ہوئے ٹویومائی روبوٹیک سسٹم کو ہدایت دیں جسے مائیکرو پورٹ نے تیار کیا ہے۔
روبوٹ نے پروفیسر پروکر کی ہدایات پر عمل کرتے ہوئے مثانے کو جسم سے نکال لیا۔
لندن میں موجود پروفیسر کی ہدایات 0.06 سیکنڈ میں جبرالٹر میں موجود روبوٹ تک پہنچ رہی تھیں اور مریض اب صحتیاب ہو رہا ہے۔
مریض نے بتایا کہ اگر یہ طریقہ کار استعمال نہ کیا جاتا تو اسے لندن جانا پڑتا اور وہاں اسپتالوں کی ویٹنگ لسٹ میں ہفتوں آپریشن کے لیے انتظار کرنا پڑتا۔
پروفیسر پروکر کے مطابق یہ ایک اہم سنگ میل ہے اور سب کچھ بہت اچھا رہا۔
لندن میں پروفیسر پروکر کا کنسول فائبر آپٹک سے منسلک تھا جبکہ بیک اپ کے طور پر 5 جی کنکشن کو تیار رکھا گیا تھا۔
