بیشتر افراد رات کو سونے سے قبل لیٹنے سے قبل پانی پینا پسند کرتے ہیں۔
مگر کیا یہ عادت صحت پر اثرات مرتب کرتی ہے؟
اگر اثرات مرتب کرتی ہے تو یہ مثبت ہوتے ہیں یا منفی؟
اس کا جواب سادہ نہیں بلکہ فوائد اور نقصان دونوں کا سامنا ہوسکتا ہے۔
تو پہلے یہ جان لیں کہ سونے سے قبل پانی پی کر لیٹنے سے صحت پر کیا اثرات مرتب ہوتے ہیں۔
پانی کی مناسب مقدار
جسم میں پانی کی مناسب مقدار مختلف جسم اور ذہن دونوں کے افعال کے لیے ضروری ہوتی ہے۔
کم پانی سے ڈی ہائیڈریشن کا سامنا ہوتا ہے جس سے مختلف مسائل کا سامنا ہوتا ہے جیسے سانس میں بو، سر درد اور دیگر۔
اگر رات کو سونے سے قبل پانی پیا جائے تو نیند کے 7 سے 9 گھنٹے کے دوران پانی کی مناسب مقدار کو برقرار رکھنے میں مدد ملتی ہے۔
بھوک کم لگتی ہے اور ہاضمہ بہتر ہوتا ہے
آرا،م اور نیند کے دوران جسم غذا کو ہضم کرتا ہے اور ہضم کرنے کے عمل کے لیے پانی کی ضرورت ہوتی ہے۔
ایسا کہا جاتا ہے کہ دن بھر میں 8 گلاس پانی پینا چاہیے اور اس سے کم پانی پینے سے قبض اور نظام ہاضمہ کے دیگر مسائل کا سامنا ہوتا ہے۔
تو سونے ے قبل پانی پینے سے نظام ہاضمہ کے افعال کو مدد ملتی ہے جبکہ صبح آنتوں کے افعال بھی بہتر ہوتے ہیں۔
پانی پینے سے بھوک کا احساس بھی کم ہوتا ہے اور زیادہ کھانے سے بچنے میں مدد ملتی ہے۔
نیند کا معیار بہتر ہوتا ہے
سونے سے قبل پانی پینے سے جسمانی درجہ حرارت کو کنٹرول میں رکھنے میں مدد ملتی ہے اور نیند بہتر ہوتی ہے۔
پانی جسم اور ذہن کے لیے ضروری ہوتا ہے اور ان کے افعال کو بہتر بناتا ہے جس میں نیند بھی شامل ہے۔
سر درد کی شدت میں کمی
دن بھر میں کم پانی پینے سے جسم میں پانی کی کمی ہوتی ہے تو سر درد یا مسلز میں تکلیف کا سامنا ہوسکتا ہے۔
سونے سے قبل پانی پینے سے سر درد یا مسلز کی تکلیف میں کمی آتی ہے۔
دماغی صحت بہتر ہوتی ہے
تحقیقی رپورٹس سے ثابت ہوا ہے کہ سونے سے قبل پانی پینے سے ڈپریشن اور انزائٹی کی علامات کی شدت میں کمی آتی ہے۔
اس کی وہ یہ ہے کہ ڈی ہائیڈریشن سے انزائٹی اور ڈپریشن کی علامات کی شدت بڑھتی ہے جبکہ نیند کے معیار میں بہتری سے بھی ڈپریشن سے بچنے میں مدد ملتی ہے۔
اب سونے سے قبل پانی پینے سے ہونے والے نقصانات جان لیں۔
ٹوائلٹ کے چکر
سونے سے قبل زیادہ پانی پینے کا مطلب یہ ہے کہ آپ رات کو کئی بار ٹوائلٹ جانے کے لیے اٹھیں گے۔
کچھ مقدار میں پانی تو بہتر ہوتا ہے جو جسم ذخیرہ کرلیتا ہے مگر زیادہ پانی پینے سے نیند متاثر ہوتی ہے۔
نیند کی کمی
رات کو ٹوائلٹ جانے کے لیے اٹھنے سے نیند کا معیار گھٹ جاتا ہے جبکہ اس کا دورانیہ بھی کم ہوتا ہے۔
بار بار اٹھنے سے بے خوابی سے متاثر ہونے کا خطرہ بڑھتا ہے۔
سینے کی تیزابیت
ایسے افراد جن کو اکثر سینے میں تیزابیت کا سامنا ہوتا ہے، وہ اگر رات کو سونے سے قبل زیادہ پانی پیتے ہیں تو اس کی علامات کی شدت بڑھ سکتی ہے۔
البتہ کم مقدار میں پانی پینے سے سینے کی تیزابیت میں کمی لانے میں مدد مل سکتی ہے۔
نوٹ: یہ مضمون طبی جریدوں میں شائع تفصیلات پر مبنی ہے، قارئین اس حوالے سے اپنے معالج سے بھی ضرور مشورہ کریں۔
