جماعت اسلامی کی جانب سے پٹرول کی بڑھتی ہوئی قیمتوں کے خلاف آج اسلام آباد کے آبپارہ چوک پر احتجاج کیا جائے گا جس کی قیادت امیر جماعت اسلامی حافظ نعیم الرحمان کریں گے۔
حافظ نعیم الرحمان نے کہا کہ موجودہ حالات میں پٹرول کی ایکس ریفائنری قیمت تقریباً 271 روپے بنتی ہے جب کہ 415 روپے فی لیٹر قیمت عوام کے ساتھ سراسر ناانصافی ہے۔ انہوں نے کہا کہ 117 روپے پٹرولیم لیوی عوام پر اضافی بوجھ ہے جسے فوری طور پر ختم کیا جانا چاہیے۔
امیرجماعت اسلامی نے حکومت پر تنقید کرتے ہوئے کہا کہ پٹرول کو عوام کی جیبیں کاٹنے اور آئی ایم ایف اہداف پورے کرنے کا ذریعہ بنا دیا گیا ہے۔ ان کا کہنا تھا کہ لیوی کا اصل قیمت سے کوئی براہِ راست تعلق نہیں اور حکومت عوام کو گمراہ کر رہی ہے۔
حافظ نعیم الرحمان نے خبردار کیا کہ اگر مطالبات تسلیم نہ کیے گئے تو ملک گیر احتجاجی تحریک چلائی جائے گی۔
