کراچی (22 مئی 2026): سوئی سدرن گیس کمپنی (ایس ایس جی سی) نے شہرِ قائد کے مختلف علاقوں کو گیس کی فراہمی عارضی طور پر معطل کرنے کا اعلان کر دیا۔
اس حوالے سے ایس ایس جی سی نے بیان جاری کیا جس میں بتایا گیا کہ نیپا فلائی اوور کے قریب بی آر ٹی روٹ پر گیس پائپ لائن کی لوئرنگ کے باعث مختلف علاقوں میں گیس فراہمی عارضی طور پر معطل رہے گی۔
ایس ایس جی سی کے مطابق بی آر ٹی روٹ پر نیپا فلائی اوور کے قریب دوسرے مرحلے میں ٹرانس کراچی کی درخواست پر کمپنی کی 20 انچ قطر کی ہائی پریشر گیس پائپ لائن کی لوئرنگ کا کام ہفتہ 23 مئی اور اتوار 24 مئی کی درمیانی شب انجام دیا جائے گا۔
بیان میں بتایا گیا کہ یہ کام سوئی سدرن گیس کمپنی کے شیڈولڈ شٹ ڈاؤن کے دوران مکمل کرنے کی کوشش کی جائے گی جو رات 10 بجے سے صبح 5 بجے تک جاری رہے گا، تاہم کام کی تکنیکی نوعیت کے پیشِ نظر اس میں توسیع ہو سکتی ہے اور مرمتی و تکنیکی سرگرمیاں صبح 8 بجے تک جاری رہنے کا امکان ہے۔
ایس ایس جی سی نے مزید کہا کہ اس دوران لیاقت نیشنل اسپتال، آغا خان اسپتال، کراچی سینٹرل پرزن سمیت متعدد علاقوں اور صارفین کو گیس کی فراہمی عارضی طور پر معطل رہے گی، اس دوران سائٹ انڈسٹریل ایریا میں گیس کے کم پریشر کا سامنا بھی ہو سکتا ہے۔
متاثرہ علاقوں کی تفصیل درج ذیل ہے:
- گلشن اقبال کے تمام بلاکس
- پی آئی بی کالونی
- جمشید روڈ
- لائنز ایریا
- پی ایچ ایس سوسائٹی
- صدر
- کهارادر کے بعض علاقے
- لیاری
- گارڈن اور اطراف کے علاقے
بیان میں کہا گیا کہ کام مکمل ہوتے ہی صارفین کو مطلع کر دیا جائے گا اور مزکورہ بالا علاقوں کی گیس بحال کر دی جائے گی، اس دوران صارفین کو درپیش آنے والی تکالیف کیلیے ادارہ معززت خواہ ہیں۔
