کراچی (25 مئی 2026): پاکستان میں سوشل میڈیا اکاؤنٹس ہیک ہونے کی شکایات عام ہو گئی ہیں اگر آپ کا واٹس ایپ اکاؤنٹ ہیک ہو جائے تو گھبرائیں نہیں۔
پاکستان میں واٹس ایپ اکاؤنٹ ہیکنگ میں خطرناک حد تک اضافہ ہو گیا ہے، روزانہ عام شہری، بزرگ، خواتین، طلبہ اور کاروباری افراد اپنے واٹس ایپ اکاؤنٹس سے محروم ہو رہے ہیں۔
اگر آپ کا واٹس ایپ اکاؤٹ ہیک ہو چکا ہے تو اس کو واپس کیسے حاصل کریں اور مستقبل میں اس کو ہیک ہونے سے کیسے محفوظ رکھیں۔ یہ آسان طریقے آپ کو بتائیں گے۔
واٹس ایپ کیسے ہیک کیا جاتا ہے؟
سب سے پہلے تو یہ جاننا ضروری ہے کہ واٹس ایپ کیسے ہیک کیا جاتا ہے تاکہ مستقبل میں اکاؤنٹ ہیک کیے جانے سے بچایا جا سکے۔
اکثر واٹس ایپ یا کسی جاننے والے کے نام سے پیغام آتا ہے کہ اکاؤنٹ کی تصدیق کرنی ہے اس لیے 6 ہندسوں کا تصدیقی کوڈ بھیج دیں۔ بعض اوقات یہ پیغام کسی دوست یا رشتے دار کے اکاؤنٹ سے آتا ہے جس کا اکاؤنٹ پہلے ہی ہیک ہو چکا ہوتا ہے۔
عموماً لوگ لاعلمی میں 6 ہندسوں والا تصدیق کوڈ شیئر کر دیتے ہیں، بس اسی ایک غلطی سے ہیکر آپ کے واٹس ایپ کا مکمل کنٹرول حاصل کر لیتا ہے۔
یاد رکھیں کہ 6 ہندسوں والا تصدیقی کوڈ کبھی بھی کسی کے ساتھ شیئر نہیں کیا جاتا ہے۔ یہ کوڈ نہ واٹس ایپ خود مانگتا ہے، اور نہ کوئی ادارہ یا جاننے والا۔
اگر آپ کا واٹس ایپ اکاؤنٹ ہیک ہو چکا ہے تو گھبرائیں نہیں۔ صرف اس آسان طریقے پر عمل کریں۔
سب سے پہلے اپنے موبائل سے واٹس ایپ ڈیلیٹ کریں اور دوبارہ انسٹال کریں اور ساتھ ہی اس کے ساتھ ہی اپنے رشتے داروں، دوستوں، دفتری ساتھیوں کو کسی اور نمبر سے اطلاع دیں کہ آپ کا واٹس ایپ اکاؤٹ ہیک ہو گیا ہے اور آپ کے نام اور نمبر سے کوئی بھی مشکوک پیغام آئے تو اس پر ہرگز یقین نہ کریں۔
اپنا وہی موبائل نمبر درج کریں جو واٹس ایپ پر رجسٹرڈ تھا۔ واٹس ایپ آپ کو کال یا ایس ایم ایس کے ذریعہ 6 ہندسوں والا کوڈ بھیجے گا یہ کوڈ درج کریں۔ زیادہ تر کیسز میں اسی مرحلے پر ہیکر کی رسائی ختم ہو جاتی ہے کیونکہ واٹس ایپ ایک وقت میں صرف ایک ڈیوائس کو اجازت دیتا ہے۔
اگر تصدیقی کوڈ نہ آ رہا ہو تو واٹس ایپ اکاؤنٹ کی بحالی اور مزید نقصان سے بچنے کے لیے پھر کیا کریں؟ یہ جاننے کے لیے نیچے دی گئی مکمل ویڈیو دیکھیں۔
