کراچی : پاکستان میں سونے کی فی تولہ قیمت میں ایک دن میں ریکارڈ کمی کے بعد 4 لاکھ 55 ہزار 327 روپے پر آگئی۔
تفصیلات کے مطابق مقامی اور عالمی مارکیٹ میں سونے اور چاندی کے خریداروں کے لیے بڑی اور خوش آئند خبر سامنے آئی، جہاں دونوں قیمتوں میں یکمشت بھاری کمی ریکارڈ کی گئی ہے۔
آل پاکستان جیمز اینڈ جیولرز ایسوسی ایشن کی جانب سے جاری کردہ اعداد و شمارمیں بتایا گیا کہ ملک بھر میں فی تولہ 24 قیراط سونے کی قیمت میں 12 ہزار 489 روپے کی ریکارڈ کمی دیکھی گئی ہے، جس کے بعد نئی قیمت 4 لاکھ 55 ہزار 327 روپے پر آگئی۔
اسی طرح 10 گرام سونا 11 ہزار 240 روپے سستا ہونے کے بعد 3 لاکھ 89 ہزار 772 روپے کا ہو گیا ہے، جبکہ 10 گرام 22 قیراط سونے کی قیمت بھی 10 ہزار 181 روپے کم ہو کر 3 لاکھ 57 ہزار 443 روپے پر آ گئی ہے۔
صرافہ ڈیلرز کا کہنا ہے کہ مقامی مارکیٹ میں اس بڑی کمی کی وجہ بین الاقوامی منڈی ہے، جہاں عالمی مارکیٹ میں سونے کی فی اونس قیمت 124.89 ڈالر کی نمایاں گراوٹ کے بعد 4328.92 ڈالر کی سطح پر پہنچ گئی ہے۔
سونے کے ساتھ چاندی کی قیمت میں نمایاں کمی ہوئی، ملک بھر میں فی تولہ چاندی 463 روپے سستی ہو گئی ہے، جس کے بعد اس کی نئی قیمت 7 ہزار 267 روپے ہو چکی ہے۔
علاوہ ازیں، 10 گرام چاندی 421 روپے کمی کے بعد 6 ہزار 202 روپے کی سطح پر آ گئی ہے، جبکہ عالمی مارکیٹ میں چاندی 4.635 ڈالر کی گراوٹ کے ساتھ 67.885 ڈالر فی اونس ریکارڈ کی گئی۔
واضح رہے کہ سونا خریدنا روایتی طور پر محفوظ سرمایہ کاری سمجھا جاتا ہے جس کی قیمت افراط زر، سیاسی اور معاشی عدم استحکام کے اوقات میں بڑھ جاتی ہے۔ اسے صدیوں سے کرنسی اور دولت کی شکل کے طور پر استعمال کیا جاتا رہا ہے، جب سرمایہ کار دوسرے اثاثوں کے بارے میں غیر یقینی محسوس کرتے ہیں، تو وہ اکثر سونا خریدے ہیں۔
پاکستان میں گزشتہ برس سونے کی قیمت کے تعین کے طریقہ کار میں تبدیلی کر دی گئی تھی، جس کے تحت سونے کی قیمت انٹرنیشنل مارکیٹ ریٹ سے 20 ڈالر فی اونس زیادہ مقرر کی گئی۔
