پاکستانی فلم انڈسٹری کی تین معروف اداکارائیں کنزا ہاشمی، زارا نور عباس اور اُشنا شاہ پہلی بار ایک ساتھ بڑے پردے پر جلوہ گر ہونے جارہی ہیں۔ تینوں اداکارائیں ثاقب خان اور بدر محمود کی آنے والی فلم ’شیروز‘ (Sheroes) میں مرکزی کردار ادا کریں گی۔
فلم کا پوسٹر جمعہ کے روز سندھ فلمز کی جانب سے جاری کیا گیا۔ سندھ فلمز حکومتِ سندھ کا ایک اقدام ہے جس کا مقصد فلم کے ذریعے صوبے کی ثقافت اور فنون کو فروغ دینا ہے۔ اس منصوبے میں جیو فلمز بھی شریک ہے۔
فلم کے پوسٹر پر درج عبارت ’’تین خواتین، تین جنگیں، ایک قوم‘‘ نے فلم کی کہانی کے حوالے سے تجسس بڑھا دیا ہے۔
پوسٹر میں زارا نور عباس کو پستول کا نشانہ بناتے ہوئے اور بلٹ پروف جیکٹ پہنے دکھایا گیا ہے، جس سے اندازہ ہوتا ہے کہ وہ فلم میں قانون نافذ کرنے والے ادارے سے وابستہ کردار ادا کر سکتی ہیں۔
دوسری جانب اُشنا شاہ باکسنگ گلوز پہنے نظر آرہی ہیں، جس سے اشارہ ملتا ہے کہ ان کا کردار مارشل آرٹس یا باکسنگ سے منسلک ہوسکتا ہے۔ امکان ہے کہ وہ ایک پیشہ ور یا ابھرتی ہوئی ایتھلیٹ کا کردار ادا کریں گی۔
کنزا ہاشمی کا کردار پوسٹر میں قدرے پراسرار رکھا گیا ہے۔ وہ جدید اور اسٹائلش لباس میں دکھائی دیتی ہیں، تاہم ان کے کردار کے پیشے یا پس منظر کے بارے میں پوسٹر سے کوئی واضح اندازہ لگانا مشکل ہے۔
فلم کے پوسٹر کے ساتھ جاری پیغام میں کہا گیا ہے کہ ’شیروز‘ ان خواتین کی تین طاقتور کہانیوں پر مبنی ہے جو اپنے اردگرد کی دنیا کو اپنی شناخت متعین کرنے کی اجازت نہیں دیتیں۔
فلم کے اس منفرد تصور نے یہ سوال بھی اٹھایا ہے کہ آیا ’شیروز‘ تین الگ الگ خواتین کی کہانیوں پر مشتمل ایک انتھالوجی فلم ہوگی یا تینوں کرداروں کی کہانیاں کسی ایک بڑی داستان میں آپس میں جڑی ہوں گی۔ فلم کی مزید تفصیلات سامنے آنے کے بعد ہی اس حوالے سے حتمی طور پر کچھ کہا جاسکے گا۔
