بھارت نے پاکستان کی میزبانی میں ہونے والے 2027 ساؤتھ ایشین گیمز (SAF Games) میں شرکت پر اصولی طور پر رضامندی ظاہر کردی ہے۔ پاکستان اولمپک ایسوسی ایشن (POA) کے مطابق بھارت نے 23 سال بعد پاکستان میں ہونے والے علاقائی کھیلوں کے مقابلوں میں شرکت پر آمادگی ظاہر کی ہے۔
14ویں ساؤتھ ایشین گیمز پاکستان میں 4 سے 11 اپریل 2027 تک منعقد ہوں گے۔ ابتدائی طور پر مقابلوں میں 28 کھیل شامل کیے گئے ہیں اور 6 ہزار سے زائد کھلاڑیوں اور آفیشلز کی شرکت متوقع ہے۔
کھیلوں کے مقابلے اسلام آباد، پنجاب اور خیبر پختونخوا میں مختلف مقامات پر منعقد ہوں گے۔ پاکستان اولمپک ایسوسی ایشن کے مطابق کھیلوں میں 346 میڈل ایونٹس شامل ہوں گے، جبکہ تقریباً 3,200 ایتھلیٹس کی شرکت کے لیے بھی انتظامات زیرِ تیاری ہیں۔
بھارت کی شرکت کو پاکستان اور بھارت کے درمیان کھیلوں کے میدان میں ایک اہم پیش رفت قرار دیا جا رہا ہے، کیونکہ دونوں ممالک کے درمیان سیاسی کشیدگی کے باعث بھارتی ٹیموں کی پاکستان آمد گزشتہ کئی برسوں سے محدود رہی ہے۔ تازہ پیش رفت سے خطے میں کھیلوں کے ذریعے رابطوں اور تعاون کے امکانات بھی بڑھ سکتے ہیں۔
پاکستان اولمپک ایسوسی ایشن کے مطابق بھارت نے شرکت پر "اصولی طور پر” رضامندی ظاہر کی ہے، اس لیے اسے فی الحال حتمی شرکت کے بجائے ابتدائی منظوری سمجھا جا رہا ہے۔
