بھارت اور جاپان کے درمیان تاریخی ٹی20 انٹرنیشنل میچ کے تمام ٹکٹ فروخت ہوگئے۔ جاپان کرکٹ ایسوسی ایشن کے مطابق دونوں ٹیموں کے درمیان ہونے والے اس تاریخی مقابلے کے لیے شائقین کی غیر معمولی دلچسپی کے باعث ٹکٹ مکمل طور پر سیل آؤٹ ہوچکے ہیں۔
یہ بھارت اور جاپان کا انٹرنیشنل کرکٹ میں پہلا باہمی ٹی20 مقابلہ ہوگا، جو 22 ستمبر 2026 کو جاپان کے صوبہ توچیگی میں واقع سانو انٹرنیشنل کرکٹ گراؤنڈ میں کھیلا جائے گا۔ میچ پاکستانی وقت کے مطابق صبح تقریباً 9 بجے شروع ہوگا۔
یہ مقابلہ سوزوکی کپ کا حصہ ہے اور اسے "Sport 75” اقدام کے تحت منعقد کیا جا رہا ہے، جس کا مقصد بھارت اور جاپان کے درمیان کھیلوں کے شعبے میں تعاون اور عوامی روابط کو فروغ دینا ہے۔ یہ میچ دونوں ممالک کے سفارتی تعلقات کے 75 سال مکمل ہونے کی تقریبات سے بھی منسلک ہے۔
بھارت اس وقت آئی سی سی ٹی20 ورلڈ کپ کا دفاعی چیمپئن ہے، جبکہ جاپان تیزی سے کرکٹ میں اپنی جگہ بنانے کی کوشش کر رہا ہے۔ جاپانی ٹیم نے اس تاریخی مقابلے کے لیے 15 رکنی اسکواڈ بھی اعلان کردیا ہے، جس کی قیادت کینڈل کادوواکِی فلیمنگ کریں گے۔
اس میچ کے ٹکٹوں کا مکمل فروخت ہوجانا جاپان میں کرکٹ کی بڑھتی ہوئی مقبولیت کے لیے ایک اہم سنگِ میل قرار دیا جا رہا ہے۔
