پاکستان کے نوجوان فاسٹ بولر رضااللہ کے شاندار ٹیسٹ ڈیبیو نے شائقین اور سوشل میڈیا صارفین کو متاثر کردیا، جہاں ان کی تیز رفتاری، منفرد ایکشن اور جارحانہ انداز کو خوب سراہا جا رہا ہے۔ انگلینڈ کے خلاف ایجبسٹن میں تیسرے ٹیسٹ کے دوران رضااللہ نے اپنے پہلے ہی ٹیسٹ اوور کی چوتھی گیند پر تجربہ کار انگلش بیٹر جو روٹ کو آؤٹ کرکے بین الاقوامی کرکٹ میں دھماکہ خیز آغاز کیا۔
21 سالہ رضااللہ نے اپنی رفتار سے بھی سب کو حیران کیا اور تقریباً 145 کلومیٹر فی گھنٹہ سے زائد کی رفتار سے گیندیں کراتے نظر آئے۔ پہلے روز انہوں نے دو وکٹیں حاصل کیں، جبکہ دوسرے روز مزید دو وکٹیں لے کر مجموعی طور پر 23 اوورز میں 148 رنز دے کر 4 وکٹیں حاصل کیں۔ ان کی وکٹوں میں جو روٹ، ایمیلیو گے، جیمی اسمتھ اور اولی رابنسن شامل تھے۔
رضااللہ کی کارکردگی پر سوشل میڈیا پر بھی خاصا جوش دیکھنے کو ملا۔ صارفین نے انہیں "New sensation in town” قرار دیا، جبکہ بعض مداحوں نے ان کی تیز رفتاری اور جارحانہ بولنگ کو پاکستان کرکٹ کے لیے امید کی نئی کرن قرار دیا۔
رضااللہ کا ٹیسٹ اسکواڈ تک پہنچنا بھی غیر معمولی سفر ہے۔ ماردان سے تعلق رکھنے والے نوجوان فاسٹ بولر نے اپنی ڈومیسٹک کرکٹ کا باقاعدہ سفر تقریباً 10 ماہ قبل شروع کیا تھا اور ان کی تیز رفتار بولنگ نے انہیں قومی ٹیم تک پہنچا دیا۔
انگلینڈ کے خلاف تیسرے ٹیسٹ میں پاکستان اگرچہ مشکلات کا شکار ہے، تاہم رضااللہ کی کارکردگی نے ایک مرتبہ پھر پاکستانی کرکٹ میں تیز رفتار بولنگ کے مستقبل کے حوالے سے امید پیدا کردی ہے۔
