ابتدائی طبی امداد ہنگامی صورتحال میں جان بچانے کا پہلا ذریعہ ہے: وزیراعلیٰ سندھ

کراچی (این این آئی) وزیراعلیٰ سندھ سید مراد علی شاہ نے کہا ہے کہ ابتدائی طبی امداد کسی بھی ہنگامی صورتحال میں قیمتی جان بچانے کا پہلا ذریعہ ہ،
حادثے یا اچانک طبی ہنگامی صورتحال میں بروقت ابتدائی طبی امداد زندگی اور موت کے درمیان فرق ثابت ہوسکتی ہے۔ ورلڈ فرسٹ ایڈ ڈے کے موقع پر اپنے پیغام میں انہوں نے کہا کہ عوام میں ابتدائی طبی امداد سے متعلق شعور اور بنیادی تربیت کو فروغ دینا وقت کی اہم ضرورت ہے۔ ورلڈ فرسٹ ایڈ ڈے ہمیں یہ یاد دلاتا ہے کہ ہنگامی صورتحال میں کوئی شخص خود کو تنہا محسوس نہ کرے۔ وزیراعلیٰ سندھ نے کہا کہ ابتدائی طبی امداد کا مقصد ڈاکٹر یا ہسپتال پہنچنے سے پہلے زخمی یا متاثرہ شخص کی حالت کو مزید بگڑنے سے روکنا ہے، حادثات کے دوران گھبراہٹ کے بجائے درست ابتدائی طبی امداد متاثرہ شخص کی حالت سنبھالنے میں مددگار ثابت ہوسکتی ہے۔ سید مراد علی شاہ نے کہا کہ حکومت ہنگامی حالات میں عوام کو بروقت طبی امداد کی فراہمی کے لیے ریسکیو اور ایمبولینس سروسز کو مزید مؤثر بنا رہی ہے۔ ریسکیو 1122 اور دیگر ہنگامی طبی خدمات حادثات اور ہنگامی صورتحال میں فوری امداد کی فراہمی میں اہم کردار ادا کررہی ہیں۔