اے سی خراب’ جنرل ہسپتال کی سنٹرل لیب میں سپیشل کیمسٹری مشین بند

لاہور (جنرل رپورٹر)لاہور جنرل ہسپتال کی سنٹرل لیب میں سپیشل کیمسٹری مشین بند ہوگئی ، اہم تشخیصی ٹیسٹ بند ، مریض ذلیل وخوار ہونے لگے ، تفصیلات کے مطابق لاہور جنرل ہسپتال کی سنٹرل لیب میں سپیشل کیمسٹری مشین خراب ہونے سے
مریضوں کے متعدد اہم تشخیصی ٹیسٹ رک گئے۔ ہسپتال ذرائع کے مطابق پینز فرسٹ فلور پر قائم سنٹرل لیب کا اے سی سسٹم خراب ہونے کے باعث مطلوبہ درجہ حرارت برقرار نہیں رہ سکا جس کے نتیجے میں سپیشل کیمسٹری مشین ورکنگ میں نہیں رہی۔ذرائع کے مطابق مشین تقریبا 18 ڈگری سینٹی گریڈ درجہ حرارت پر کام کرتی ہے تاہم اے سی خراب ہونے کے باعث سنٹرل لیب کا درجہ حرارت تقریبا 27 ڈگری سینٹی گریڈ تک پہنچ گیا۔ درجہ حرارت میں اضافے کے باعث مشین متاثر ہونے سے ڈینگی، ہیپاٹائٹس، تھائیرائیڈ اور شوگر سمیت مختلف اہم ٹیسٹ متاثر ہوئے ہیں، جبکہ وٹامن ڈی اور CA-125 جیسے ٹیسٹ بھی دستیاب نہیں رہے۔ہسپتال آنے والے مریضوں کو اہم ٹیسٹوں کے لیے مشکلات کا سامنا ہے جبکہ سرکاری ہسپتال کی مرکزی لیبارٹری میں بنیادی کولنگ سسٹم کی خرابی کے باعث مہنگی تشخیصی مشین کا غیر فعال ہونا انتظامی نگرانی پر بھی سوالیہ نشان بن گیا ہے۔ہیڈ آف سنٹرل لیب پروفیسر نازش نے تصدیق کرتے ہوئے کہا کہ اے سی خراب ہونے کے باعث سپیشل کیمسٹری مشین ورکنگ میں نہیں ہے۔دوسری جانب ایم ایس لاہور جنرل ہسپتال ڈاکٹر فرہاد حسین نے کہا کہ مشین خراب ہونے کا میرے علم میں نہیں معلوم کرواتا کہ مشین کیوں بند ہے ۔