عالمی مارکیٹ میں سونے کی قیمت میں ایک بار پھر کمی ریکارڈ کی گئی ہے اور اسپاٹ گولڈ 4,400 ڈالر فی اونس کی سطح سے نیچے آ گیا۔ جمعرات کو سونے کی قیمت 0.4 فیصد کمی کے بعد تقریباً 4,385.40 ڈالر فی اونس ریکارڈ کی گئی۔ امریکی گولڈ فیوچرز بھی 0.7 فیصد کمی کے ساتھ 4,427.80 ڈالر فی اونس پر آگئے۔
ماہرین کے مطابق سونے کی قیمت میں کمی کی بڑی وجوہات میں امریکی ڈالر کی مضبوطی اور امریکی بانڈز کی شرحِ منافع میں اضافہ شامل ہیں۔ مضبوط ڈالر کے باعث دیگر کرنسیوں میں سونا مہنگا پڑتا ہے، جبکہ بڑھتی ہوئی بانڈ ییلڈز غیر منافع بخش اثاثے سونے کی کشش کم کرتی ہیں۔
مارکیٹ میں اس وقت امریکا کے مہنگائی کے اعداد و شمار پر خصوصی توجہ مرکوز ہے، کیونکہ یہ اعداد و شمار امریکی فیڈرل ریزرو کے آئندہ شرحِ سود سے متعلق فیصلے پر اثر انداز ہوسکتے ہیں۔ مارکیٹ میں اس وقت رواں ماہ شرحِ سود میں اضافے کا امکان بھی زیرِ بحث ہے۔
پاکستانی مارکیٹ میں بھی سونے کی قیمت میں کمی دیکھی گئی۔ بزنس ریکارڈر کے مطابق 10 ستمبر کو 24 قیراط سونے کی فی تولہ قیمت 600 روپے کم ہوکر 462,336 روپے ہوگئی، جبکہ عالمی مارکیٹ میں سونے کی قیمت 6 ڈالر کمی کے بعد 4,398 ڈالر فی اونس رپورٹ ہوئی۔
