خلیجی ممالک کو منشیات اسمگلنگ کی 12 کوششیں ناکام بنا دی گئیں

راولپنڈی (آئی این پی) اے این ایف کا ملک کے مختلف بین الاقوامی ایئرپورٹس پر منشیات اسمگلنگ کے خلاف کریک ڈائون، خلیجی ممالک کو منشیات اسمگلنگ کی 12 کوششیں ناکام بنا دی گئیں۔ اے این ایف کے مطابق 12 انٹیلی جنسبیسڈ آپریشنز میں 18 ملزمان کو گرفتار کیا گیا جبکہ کارروائیوں کے دوران مجموعی طور پر 46.936 کلو گرام منشیات برآمد کی گئی۔ ترجمان کے مطابق برآمد شدہ منشیات میں 37.654 کلو گرام آئس، 2.500 کلو گرام ہیروئن اور 6.762 کلو گرام نشہ آور گولیاں شامل ہیں۔ اے این ایف نے بتایا کہ گرفتار ملزمان سعودی عرب، متحدہ عرب امارات اور بحرین روانہ ہو رہے تھے، جن میں بیشتر افراد عمرہ کی ادائیگی کے لیے جا رہے تھے۔ ابتدائی تحقیقات میں جعلی فری عمرہ پیکجز کے ذریعے منشیات اسمگلنگ کا انکشاف بھی ہوا ہے۔ اے این ایف حکام کے مطابق مسافروں کو ہدایت کی گئی ہے کہ وہ نامعلوم افراد کے دیئے گئے پارسل یا اشیاء بیرون ملک لے جانے سے گریز کریں، کیونکہ ایسی سرگرمیاں سنگین قانونی نتائج کا باعث بن سکتی ہیں۔ اے این ایف نے کہا ہے کہ خلیجی ممالک کو منشیات اسمگلنگ کی روک تھام کے لیے انٹیلی جنس معلومات اور ایئرپورٹس پر موثر نگرانی کے ذریعے کارروائیاں جاری ہیں جبکہ متعلقہ اداروں کے تعاون سے انسداد منشیات اقدامات مزید تیز کیے جا رہے ہیں۔