غزہ سٹی کے مغربی علاقے رِمال میں ہفتے کی صبح ایک رہائشی اپارٹمنٹ پر اسرائیلی فضائی حملے کے نتیجے میں کم از کم 5 فلسطینی جاں بحق اور 6 شدید زخمی ہوگئے۔ طبی حکام کے مطابق حملہ الاصالہ بلڈنگ میں ہوا اور اس سے قبل رہائشیوں کو کوئی انتباہ نہیں دیا گیا تھا۔
رِمال غزہ سٹی کے گنجان آباد علاقوں میں شمار ہوتا ہے، جہاں بڑی تعداد میں بے گھر فلسطینی بھی پناہ لیے ہوئے ہیں۔ حملہ رات کے وقت ہوا جب زیادہ تر لوگ سو رہے تھے۔ مقامی رپورٹس کے مطابق میزائل نے نشانہ بنائے گئے اپارٹمنٹ کو نقصان پہنچانے کے ساتھ عمارت کی نچلی منزلوں کو بھی متاثر کیا۔
الشفا اسپتال کے طبی عملے کے مطابق جاں بحق ہونے والوں میں چار خواتین بھی شامل ہیں، جن میں ایک عمر رسیدہ عیسائی خاتون اور ان کی بیٹی شامل تھیں۔ زخمیوں کو علاج کے لیے الشفا اسپتال منتقل کیا گیا۔ سول ڈیفنس اہلکار ملبے میں ممکنہ طور پر دبے مزید افراد اور لاشوں کی تلاش جاری رکھے ہوئے تھے۔
رائٹرز کے مطابق اسرائیلی فوج کی جانب سے فوری طور پر اس حملے پر کوئی تبصرہ سامنے نہیں آیا۔ اسرائیل کا مؤقف ہے کہ حماس دوبارہ مسلح ہو رہی ہے اور جنگ بندی کی خلاف ورزیوں میں ملوث ہے، جبکہ حماس ان الزامات کی تردید کرتی ہے اور اسرائیل پر غزہ میں جنگ بندی کو نقصان پہنچانے کا الزام عائد کرتی ہے۔
غزہ سٹی میں اسرائیلی فضائی حملہ اپارٹمنٹ پر بمباری سے 5 فلسطینی جاں بحق
