شمالی کوریا نے ہفتے کی صبح مشرقی سمندر کی جانب ایک بیلسٹک میزائل فائر کیا۔ جنوبی کوریا کی فوج کے مطابق میزائل وونسان کے علاقے سے تقریباً صبح 6:30 بجے داغا گیا اور 700 کلومیٹر سے زائد کا فاصلہ طے کرنے کے بعد سمندر میں جاگرا۔ جنوبی کوریا اور امریکا میزائل کی مزید تفصیلات کا جائزہ لے رہے ہیں۔
یہ میزائل تجربہ ایسے وقت میں ہوا جب دونوں ممالک کے درمیان ڈی ایم زیڈ میں بارودی سرنگ کے دھماکے پر کشیدگی جاری ہے۔ جنوبی کوریا کا کہنا ہے کہ 21 ستمبر کو شمالی کوریا کی جانب سے نصب کی گئی بارودی سرنگوں کے دھماکے سے اس کے 3 فوجی زخمی ہوئے، جبکہ پیانگ یانگ نے اس الزام اور ذمہ داری سے انکار کیا ہے۔
جنوبی کوریا نے شمالی کوریا سے واقعے پر معافی مانگنے اور سرحدی تنصیبات کی تعمیر روکنے کا مطالبہ کیا تھا۔ شمالی کوریا کی رہنما کم یو جونگ نے اس مطالبے کو مسترد کرتے ہوئے جنوبی کوریا کے الزامات کو بے بنیاد قرار دیا۔
جنوبی کوریا کے صدارتی دفتر نے میزائل تجربے کے بعد قومی سلامتی کونسل کا ہنگامی اجلاس طلب کیا، جبکہ جنوبی کوریا، امریکا اور جاپان نے شمالی کوریا کی مزید ممکنہ میزائل سرگرمیوں پر نگرانی بڑھانے اور معلومات کے تبادلے کا فیصلہ کیا۔
