خیبر پختونخوا میں ایمرجنسی آخری آپشن کے طور پر نافذ کی: اعظم ندیر تارڑ

اسلام آباد (سٹاف رپورٹر) وفاقی وزیر قانون اعظم نذیر تارڑ نے کہا ہے کہ خیبر پختونخوا میں ایمرجنسی کے نفاذ کا فیصلہ حکومت نے خوش دلی سے نہیں بلکہ تمام پہلوں کا جائزہ لینے اور دیگر راستے آزمانے کے بعد آخری آپشن کے طور پر کیا۔ صدر مملکت کی جانب سے ایمرجنسی کے اعلان کے بعد آئین کے تحت دس روز کے اندر پارلیمان سے منظوری لینا ضروری ہے، اسی مقصد کے لیے معاملہ قومی اسمبلی میں پیش کیا گیا۔ انہوں نے دعوی کیا کہ خیبر پختونخوا میں امن و امان کی صورت حال اور صوبائی حکومت کے طرزِ عمل کے باعث ملکی سلامتی کے حوالے سے تشویش بڑھ رہی تھی۔قومی اسمبلی میں خطاب کرتے ہوئے اعظم نذیر تارڑ نے کہا کہ وفاقی کابینہ نے صورت حال پر غور، متعلقہ مواد کا جائزہ اور مشاورت کرنے کے بعد ایمرجنسی کی سفارش کی۔ ان کے مطابق خیبر پختونخوا میں اندرونی خلفشار اور امن و امان کی صورت حال اس نہج پر پہنچ چکی تھی کہ وفاقی حکومت کے نزدیک ایمرجنسی کا اقدام ناگزیر ہو گیا تھا۔ انہوں نے کہا کہ دہشت گردی کے خلاف کارروائیوں میں وفاق اور صوبے کے درمیان تعاون بنیادی اہمیت رکھتا ہے، تاہم ان کے بقول صوبائی حکومت کا رویہ ملکی سلامتی کے لیے تشویش کا باعث بنتا جا رہا تھا۔وزیر قانون نے دہشت گردی کے واقعات کے اعداد و شمار پیش کرتے ہوئے کہا کہ 2024 تک دہشت گردی کے 2 ہزار 911 واقعات ریکارڈ کیے گئے، جبکہ 15 اکتوبر 2025 سے اب تک 3 ہزار 787 واقعات پیش آ چکے ہیں۔ انہوں نے کہا کہ دہشت گردی کے خلاف کارروائیوں میں پاک فوج کے جوان قربانیاں دے رہے ہیں اور ان حالات میں صوبائی حکومت کی ذمہ داری ہے کہ وہ امن و امان کے قیام کے لیے وفاق کے ساتھ تعاون کرے۔اعظم نذیر تارڑ نے کہا کہ پاک فوج کے بہادر جوانوں نے قربانیاں دے کر خیبر پختونخوا میں امن قائم کرنے اور دہشت گردی پر قابو پانے میں اہم کردار ادا کیا تھا۔ ان کے مطابق دہشت گردی کے واقعات میں سکیورٹی اہلکاروں کی شہادتوں کے باوجود صوبائی حکومت کی جانب سے امن و امان کی صورت حال کو نظر انداز کرتے ہوئے وفاق کی جانب پیش قدمی اور احتجاجی سرگرمیوں کا اعلان کیا گیا۔انہوں نے سوال اٹھایا کہ جب دہشت گردی کے واقعات میں فوجی جوان اپنی جانیں قربان کر رہے ہوں تو کیا صوبائی حکومت کی ذمہ داری نہیں بنتی کہ وہ شہدا کے جنازوں میں شرکت کرے اور دہشت گردی کے خلاف قومی کوششوں کا حصہ بنے؟ وزیر قانون نے زور دیا کہ دہشت گردی کے خلاف جنگ میں سیاسی اختلافات سے بالاتر ہو کر مشترکہ حکمت عملی اپنانا ضروری ہے۔
اعظم نذیر تارڑ نے بتایا کہ حکومت نے ایمرجنسی کے اقدام سے پہلے مذاکرات کو ترجیح دی۔ ان کے مطابق صدر مملکت کی تجویز پر حکومت اور تحریک انصاف کے درمیان بات چیت شروع کی گئی اور بھرپور کوشش کی گئی کہ معاملات کو جمہوری طریقے سے حل کیا جائے۔ انہوں نے کہا کہ حکومت نے مذاکرات کے ذریعے مسئلے کا حل نکالنے کی ہر ممکن کوشش کی، تاہم یہ کوششیں کامیاب نہ ہو سکیں۔وزیر قانون نے کہا کہ ایمرجنسی کا فیصلہ حکومت کا پسندیدہ راستہ نہیں تھا بلکہ اسے آخری آپشن کے طور پر اختیار کیا گیا۔ ان کے مطابق حکومت نے حالات کو سیاسی اور جمہوری انداز میں حل کرنے کے لیے تمام ممکنہ کوششیں کیں، لیکن کامیابی نہ ملنے کے بعد آئینی اقدام اٹھانے کا فیصلہ کیا گیا۔اعظم نذیر تارڑ نے گرفتار افراد کی رہائی کے معاملے پر بھی وضاحت کرتے ہوئے کہا کہ کسی گرفتار شخص کی رہائی کا اختیار عدالت کے پاس ہے۔ ان کے مطابق صدر مملکت کسی شخص کی رحم کی اپیل موصول ہونے پر اپنے آئینی اختیار کے تحت فیصلہ کر سکتے ہیں۔ انہوں نے کہا کہ حکومت کے لیے سیاست سے زیادہ ریاست اہم ہے اور قومی سلامتی کے معاملات کو سیاسی مفادات پر ترجیح دی جانی چاہیے۔وزیر قانون کے خطاب میں وفاقی حکومت کے مقف کو واضح کیا گیا کہ خیبر پختونخوا میں ایمرجنسی کا نفاذ امن و امان کی صورت حال اور دہشت گردی کے بڑھتے ہوئے واقعات کے تناظر میں کیا گیا۔ دوسری جانب تحریک انصاف اس اقدام کی مخالفت کر رہی ہے اور اسے سیاسی طور پر غیر مناسب قرار دے رہی ہے۔خیبر پختونخوا میں ایمرجنسی کے معاملے پر قومی اسمبلی میں ہونے والی بحث کے دوران حکومت اور اپوزیشن کے درمیان اختلافات نمایاں رہے۔ حکومت نے اپنے اقدام کو آئینی ضرورت اور امن و امان کی صورت حال سے جوڑا، جبکہ اپوزیشن کی جانب سے اس کی مخالفت کی گئی۔ آئندہ سیاسی پیش رفت کا انحصار اس بات پر ہوگا کہ حکومت اور تحریک انصاف کے درمیان مذاکرات کا راستہ دوبارہ کھلتا ہے یا نہیں۔