پی اے آر سی کیجانب سے بانی چیئرمین کے اعزاز میں تعزیتی اجلاس

اسلام آباد(نامہ نگار خصوصی ) پاکستان زرعی تحقیقاتی کونسل (PARC) نے ادارے کے بانی چیئرمین اور ممتاز سائنسدان ڈاکٹر امیر محمد (ہلال امتیاز) کی زندگی اور ملک کے لیے خدمات کو خراج عقیدت پیش کرنے کے لیے قومی زرعی تحقیقاتی مرکز (NARC) اسلام آباد میں ایک تعزیتی ریفرنس کا انعقاد کیا۔ زرعی تحقیق اور قومی ترقی کے لیے ان کی
شاندار خدمات کو خراج تحسین پیش کرتے ہوئے، این اے آرسی کے کراپ سائنسز انسٹی ٹیوٹ کا نام تبدیل کر کے ڈاکٹر امیر محمد انسٹی ٹیوٹ آف کراپ سائنسز کر دیا گیا ہے۔ چیئرمین پی اے آر سی ڈاکٹر سید مرتضی حسن اندرابی نے ڈاکٹر امیر محمد کی دور اندیش قیادت اور پاکستان کے زرعی تحقیقی نظام کو مضبوط بنانے میں نمایاں کردار کو خراج تحسین پیش کیا۔ تقریب سے خطاب کرت ہوئے چئیرمین پی اے آرسی کا کہنا تھا کہ ڈاکٹر امیر محمد کے وژن اور قیادت نے ملک کی اعلی زرعی تحقیقی تنظیم کے طور پر پی اے آرسی کی بنیاد رکھی اور ایسے ادارے بنانے میں مدد کی جو سائنسی اور قومی ترقی میں اپنا کردار ادا کر رہے ہیں۔ انہوں نے اس بات پر زور دیا کہ ان کے اعزاز میں کراپ سائنسز انسٹی ٹیوٹ کا نام تبدیل کرنا ان کی اس لازوال میراث کا اعتراف ہے، جو سائنسدانوں اور محققین کی آنے والی نسلوں کی رہنمائی کرتا رہے گا۔ ڈاکٹر امیر محمد نے نیوکلیئر انسٹی ٹیوٹ فار ایگریکلچر اینڈ بائیولوجی (NIAB) فیصل آباد کے بانی ڈائریکٹر، یونیورسٹی آف ایگریکلچر، فیصل آباد کے وائس چانسلر، اور نیشنل یونیورسٹی آف کمپیوٹر اینڈ ایمرجنگ سائنسز (FAST) کے بانی ریکٹر کے طور پر بھی خدمات انجام دیں۔ 1978 سے 1990 تک چیئرمین پی اے آرسی کی حیثیت سے انہوں نے ایک مربوط قومی زرعی تحقیقی نظام کی بنیاد رکھی۔ تعزیتی ریفرنس میں ڈاکٹر امیر محمد کی بیٹیوں اور اہل خانہ، پی اے آرسی کے حاضر سروس و ریٹائرڈ ملازمین اور دیگر تحقیقی اداروں کے نمائندوں نے شرکت کی۔ مقررین نے ان کی نمایاں سائنسی کامیابیوں، دور اندیش قیادت اور پاکستان کے تحقیقی اور اعلی تعلیم کے شعبوں میں دیرپا تعاون پر روشنی ڈالی۔