لاہور(کرائم رپورٹر)انسپکٹر جنرل پولیس پنجاب عبدالکریم نے لاہور میں2009 میں دہشتگردوں کے تین مختلف مقامات پر حملوں میں جامِ شہادت نوش کرنے والے 15 پولیس شہداء کی 17ویں برسی کے موقع پر شہدا پولیس کو خراجِ عقیدت پیش کیا۔ آئی جیپنجاب نے کہا کہ فرض کی راہ میں جانیں قربان کرنے والے عظیم سپوتوں اور ان کی فیملیز کو سلام پیش کرتے ہیں۔ پنجاب پولیس اپنے بہادر فرزندوں کی لازوال قربانیوں کو کبھی فراموش نہیں کرے گی۔ترجمان پنجاب پولیس نے تفصیلات سے آگاہ کرتے ہوئے بتایا کہ 15 اکتوبر 2009 میں دہشت گردوں نے تین مختلف مقامات، پولیس ٹریننگ سنٹر مناواں، ایلیٹ پولیس ٹریننگ سکول اور ایف آئی اے بلڈنگ کو نشانہ بنایا تھا۔ تینوں حملوں میں پولیس کے 15 افسران و اہلکاروں نے جامِ شہادت نوش کیا۔ پولیس ٹریننگ سنٹر مناواں پر دہشت گردوں کے حملے میں 11 پولیس اہلکار، ایلیٹ پولیس ٹریننگ سکول پر حملے میں 3 اہلکار جبکہ ایف آئی اے بلڈنگ پر حملے میں ایک پولیس افسر شہید ہوا تھا۔ شہید ہونے والوں میں 3 انسپکٹر، 2 سب انسپکٹر، ایک اے ایس آئی، ایک ہیڈ کانسٹیبل، 5 کانسٹیبلز اور 3 ڈرائیور کانسٹیبلز شامل تھے۔ ایف آئی اے بلڈنگ پر خودکش حملے میں انسپکٹر رانا فاروق شہید ہوئے۔ پولیس ٹریننگ سنٹر مناواں پر حملے میں انسپکٹر سلامت علی، شیر احمد، سب انسپکٹر محمد انور، محمد اسلم، ہیڈ کانسٹیبل محمد طاہر، کانسٹیبل محمد شکیل، محمد آصف، زاہد علی اور ڈرائیور کانسٹیبلز ظہیر احمد، سیف اللہ اور نصر اللہ نے جامِ شہادت نوش کیا۔ پولیس ٹریننگ کالج میں دہشت گردوں سے مقابلے کے دوران اے ایس آئی غلام جعفر، کانسٹیبلز عرفان بخاری اور ساجد حسین شاہ شہید ہوئے۔
