وزیر خزانہ کی موڈیز سے ملاقات، پاکستان کی کریڈٹ ریٹنگ میں مزید بہتری اور عالمی سرمایہ منڈیوں تک رسائی پر تبادلہ خیال

بنکاک (این این آئی) وفاقی وزیرِ خزانہ و محصولات، سینیٹر محمد اورنگزیب نے تھائی لینڈ کے شہر بنکاک میں ورلڈ بینک گروپ اور آئی ایم ایف کے سالانہ اجلاسوں کے موقع پر موڈیز کے نمائندوں سے ملاقات کی، جس میں پاکستان کے معاشی منظرنامے اور خودمختار کریڈٹ پروفائل پر تبادلہ خیال کیا گیا۔ گفتگو میں پاکستان کی کریڈٹ ریٹنگ میں حالیہ بہتری، مالیاتی اور بیرونی شعبے کے اشاریوں میں بہتری اور بین الاقوامی سرمایہ منڈیوں تک دوبارہ رسائی کے امور زیرِ بحث آئے۔ وزیرِ خزانہ نے بیرونی قرضوں کے مجموعی حجم میں اضافہ کیے بغیر مہنگے اور قلیل مدتی قرضوں کی جگہ طویل مدت کے مالی وسائل حاصل کرنے کے لیے جاری کوششوں سے آگاہ کیا۔ پاکستانی وفد نے زرمبادلہ کے ذخائر میں اضافے، جاری کھاتے کے خسارے کو محدود رکھنے اور اسٹیٹ بینک کی فارورڈ واجبات میں کمی کو اجاگر کیا۔ وزیرِ خزانہ نے آئی ایم ایف پروگرام کے بعد بھی ساختی اصلاحات جاری رکھنے اور برآمدات پر مبنی پائیدار معاشی ترقی کے عزم کا اعادہ کیا۔ وزیرِ خزانہ نے موڈیز کے نمائندوں سے پاکستان کی کریڈٹ ریٹنگ میں مزید بہتری کے امکانات اور درجہ بندی کے جائزے میں سیاسی خطرات اور معاشی کارکردگی کو مناسب طور پر مدِنظر رکھنے کے حوالے سے بھی آرا طلب کیں۔