پاکستان 2027ء میں ورلڈ بینک گروپ آئی ایم ایف کے بورڈز آف گورنرز کی سربراہی کریگا، وزارت اقتصادی امور

اسلام آباد (این این آئی) وزارت اقتصادی امور حکومت پاکستان نے کہا ہے کہ پاکستان 2027ء میں ورلڈ بینک گروپ اور آئی ایم ایف کے بورڈز آف گورنرز کی سربراہی کرے گا، وزیر اقتصادی امور احد چیمہ کو 2027ء کے لئے دونوں اداروں کے بورڈز آف گورنرز کا آئندہ چیئرمین نامزد کر دیا گیا ہے۔ جاری بیان میںوزارت اقتصادی امور نے بتایا کہ یہ اعلان بنکاک میں ورلڈ بینک گروپ اور آئی ایم ایف کے سالانہ اجلاسوں کے پلینری سیشن میں کیا گیا، پاکستان 1953ء کے بعد پہلی مرتبہ ورلڈ بینک گروپ اور آئی ایم ایف کے بورڈز آف گورنرز کی سربراہی کرے گا، پاکستان کی چیئرمین شپ عالمی اقتصادی و ترقیاتی امور پر موثر کردار ادا کرنے کا اہم موقع ہے، وفاقی وزیر احد چیمہ کو ورلڈ بینک گروپ کے کارپوریٹ سیکرٹریٹ نے چیئرمین شپ کی ذمہ داریوں پر بریفنگ دی۔ وزارت اقتصادی امور کے مطابق وفاقی وزیر احد چیمہ نے ڈبلیو بی جی کی نائب صدر اور کارپوریٹ سیکرٹری ارادھانا کمار کپور سے ملاقات کی، ملاقات میں پاکستان کی مدت سربراہی کے دوران ادارہ جاتی معاونت اور رابطہ کاری پر تبادلہ خیال کیا گیا، احد خان چیمہ کی سبکدوش ہونے والے چیئرمین کارلوس کاروالو اسپالڈنگ سے بھی ملاقات ہوئی۔ وفاقی وزیر نے کارلوس اسپالڈنگ کو کامیابی سے مدت عہدہ مکمل کرنے پر مبارکباد دی، دونوں رہنمائوں نے چیئرمین شپ کی ذمہ داریوں اور آئندہ سال کی ترجیحات پر تبادلہ خیال کیا۔ احد چیمہ نے کہا کہ پاکستان ترقی پذیر ممالک کی آواز موثر بنانے کے لئے اپنا کردار ادا کرے گا، ترقیاتی مالی وسائل کی موثر اور قابل پیشگوئی فراہمی پاکستان کی ترجیحات میں شامل ہے، پاکستان کثیرالجہتی ترقیاتی اداروں کے درمیان رابطہ کاری بہتر بنانے کے عزم پر قائم ہے، پاکستان پائیدار اور جامع ترقی کے لیے نجی سرمایہ کاری متحرک کرنے کا خواہاں ہے، پاکستان موثر کثیرالجہتی ترقیاتی و مالیاتی نظام کے لیے ورلڈ بینک گروپ، آئی ایم ایف اور رکن ممالک کے ساتھ کام کرے گا۔