ملک کے ابتر معاشی حالات غیر یقینی صورتحال 3 سال میں 18 لاکھ 70 ہزار اعلی تعلیم طافتہ افراد پاکستان چھوڑ گے

اسلام آباد (لیڈی رپورٹر رپورٹر) پاکستان سے پڑھے لکھے اور ہنرمند طبقے کے فرار سے متعلق
ایک ایسا ہولناک اور چونکا دینے والا انکشاف سامنے آیا ہے جس نے اقتدار کے ایوانوں میں ہلچل مچا دی ہے۔ سرکاری دستاویزات کے مطابق، ملک کے ابتر معاشی حالات اور غیر یقینی صورتحال کے باعث گزشتہ 3 سال کے قلیل عرصے میں 18 لاکھ 71 ہزار سے زائد اعلیٰ تعلیم یافتہ افراد پاکستان چھوڑ کر چلے گئے ہیں۔ذرائع کے مطابق، ملک چھوڑنے والوں میں صرف عام مزدور ہی نہیں، بلکہ پاکستان کا اصل سرمایہ یعنی ہزاروں ڈاکٹرز، انجینئرز، پی ایچ ڈی اسکالرز، آئی ٹی ماہرین، اور نرسز شامل ہیں۔ یہ پڑھا لکھا طبقہ اپنے ہی ملک میں روزگار کے مناسب مواقع نہ ہونے، ریکارڈ توڑ مہنگائی، اور پیشہ ورانہ عدم تحفظ کے باعث ملک سے مایوس ہو کر ہجرت کرنے پر مجبور ہوا۔ دستاویزات کے مطابق، بیرونِ ملک منتقل ہونے والے ان لاکھوں پاکستانیوں نے خلیجی ممالک، برطانیہ، یورپ، کینیڈا اور امریکہ کا رخ کیا ہے۔ ہجرت کرنے والے اس اعلیٰ ترین دماغی سرمائے کی وجہ سے پاکستان کے ہسپتالوں، یونیورسٹیوں اور آئی ٹی انڈسٹری میں ماہرین کی شدید کمی کا سامنا کرنا پڑ رہا ہے۔مبصرین کا کہنا ہے کہ یہ اعداد و شمار صرف ایک ہندسہ نہیں، بلکہ ریاست کے لیے ایک سنگین تازیانہ ہیں جو یہ ظاہر کرتے ہیں کہ ملک کا ٹیلنٹ یہاں اپنا مستقبل محفوظ نہیں سمجھتا۔ ماہرین نے انتباہ کیا ہے کہ اگر حکومت نے فوری طور پر معاشی اصلاحات نہ کیں اور نوجوانوں کو روزگار کے پرکشش مواقع فراہم نہ کیے، تو پاکستان کا یہ برین ڈرین ملکی بقا کے لیے ایک ناقابلِ تلافی نقصان بن جائے گا۔
پاکستان چھوڑ گئے