عقیدہ ختم نبوت اسلام کی اساس’اہم بنیادی عقیدہ:مولانا عبدالنعیم و دیگر

لاہور (خبر نگار) عالمی مجلس تحفظ ختم نبوت کے مبلغ مولانا عبدالنعیم، مولانا عمرحیات، مولانا قاری صدیق توحیدی، قاری محمد اقبال، مولانا حمزہ ذکی، مولانا مہتاب، مولانا سمیع اللہ، حامد بلوچ، مولانا زید کمبوہ نے خطبات جمعہ میں خطاب کرتے ہوئے کہا ہے کہ عقیدہ ختم نبوت اسلام کی اساس اور اہم ترین بنیادی عقیدہ ہے۔ دین اسلام کی پوری عمارت اس عقیدے پر کھڑی ہے’ یہ ایک حساس عقیدہ ہے اس میں شک و شبہات کا ذرا سا بھی رخنہ پیدا ہو جائے تو مسلمان نہ صرف اپنی متاع ایمان کھو بیٹھتا ہے بلکہ وہ امت محمدیہ سے بھی خارج ہو جاتا ہے۔ نبی مکرم’ رسول معظم رحمت عالم ۖکو صادق و مصدق سمجھنا اور آپ کی نبوت و رسالت کو آخری تسلیم کرنا، ایمان، ہدایت، ابدی کامیابی اور نجات کی بنیاد ہے۔ آپۖ کے بعد نبوت کا دروازہ ہمیشہ ہمیشہ کیلئے بند ہے اور اس سے انکار کفر و ارتداد ہے جس سے کوئی تاویل نہیں بچا سکتی۔ صحابہ کرام رضوان اللہ علیھم اجمعین سے لیکر آج تک تمام امت مسلمہ کا اس پر اجماع ہے۔ اس عقیدے کا دفاع پورے دین اسلام کا دفاع ہے جس کیلئے عاشقان مصطفیٰ نے لازوال قربانیاں دیں۔ علما نے کہا کہ آج تحفظ ختم نبوت کانفرنس آئیڈیل پارک ٹائون شپ لاہور میں منعقد ہوگی تمام مسلمان کانفرنس شریک ہوکر عقیدہ ختم نبوت کی چوکیداروں میں شامل ہوں۔ کانفرنس میں علمائے کرام بڑی تعداد میں شریل ہونگے۔ علما نے پشاور کے دیر کالونی میں سکول کی چھت گرنے کے المناک حادثے میں معصوم بچوں کی شہادت پر گہرے دکھ اور افسوس کا اظہار کیا اور کہا کہ معصوم بچوں کی شہادت کا یہ سانحہ پوری قوم کیلئے انتہائی دردناک ہے۔ اس افسوسناک واقعے پر ہر آنکھ اشکبار اور ہر دل غمگین ہے۔ انہوں نے شہید بچوں کے اہلخانہ سے دلی تعزیت اور ہمدردی کا اظہار کرتے ہوئے کہا کہ دکھ کی اس گھڑی میں ہم سوگوار خاندانوں کے غم میں برابر کے شریک ہیں۔ رہنمائوں نے اللہ تعالیٰ سے دعا کی کہ وہ شہید بچوں کی مغفرت فرمائے، انہیں جنت الفردوس میں اعلی مقام عطا کرے، والدین اور لواحقین کو صبرِ جمیل عطا فرمائے، زخمیوں کو جلد صحتِ کاملہ نصیب فرمائے اور ملک بھر میں ایسے افسوسناک حادثات سے محفوظ رکھے۔