32 ممالک کی نمائندگی کرنیوالے وفد کا ایمرجنسی سروسز ہیڈ کوارٹرز کا دورہ

لاہور (کرائم رپورٹر) افریقی و ایشیائی رورل ڈویلپمنٹ آرگنائزیشن(AARDO) اور اختر حمید خان نیشنل سنٹر فار رورل ڈویلپمنٹ (AHKNCRD) کے 32 رکن ممالک کی نمائندگی کرنے والے22 رکنی بین الاقوامی وفد نے آرڈو کے اسسٹنٹ سیکرٹری جنرل رامی قطیشات کی سربراہی میں ایمرجنسی سروسز ہیڈ کوارٹرز اور ایمرجنسی سروسز اکیڈمی لاہور کا دورہ کیا۔ یہ دورہ اختر حمید خان نیشنل سنٹر فار رورل ڈویلپمنٹ اور آرڈو کے اشتراک سے منعقدہ بین الاقوامی تربیتی ورکشاپ ڈیزاسٹر مینجمنٹ اور موسمیاتی تبدیلی سے مطابقت (14 تا 22 اکتوبر 2026ئ، اسلام آباد) کا حصہ تھا۔ ورکشاپ کا مقصد موسمیاتی تبدیلی کے اثرات سے متعلق آگاہی بڑھانا، آفات سے نمٹنے کے لیے تیاری، رسپانس اور بحالی کی صلاحیتوں کو مستحکم کرنا اور ڈیزاسٹر رسک ریڈکشن (DRR) کی منصوبہ بندی میں موسمیاتی تبدیلی سے مطابقت کے اقدامات کو شامل کرنے کے عمل کو فروغ دینا تھا۔ دورے کے دوران وفد کو پنجاب ایمرجنسی سروس (ریسکیو1122 ) کے آپریشنل ماڈل، ڈیزاسٹر مینجمنٹ کی صلاحیتوں اور خصوصی تربیتی پروگرامز کے بارے میں بریفنگ دی گئی۔ مندوبین نے سروس کے آپریشنل طریقہ کار اور ڈیزاسٹر مینجمنٹ کے انتظامات کا مشاہدہ کیا جبکہ جدید تربیتی سیمولیٹرز پر ریسکیو کیڈٹس کی جانب سے زندگی بچانے کی مہارتوں کے عملی مظاہرے بھی دیکھے۔ سیکرٹری محکمہ ایمرجنسی سروسز اور ریسکیو 1122 کے بانی ڈاکٹر رضوان نصیر نے وفد کو سروس کے قیام، ارتقا اورپراگریس کے بارے میں تفصیلی بریفنگ دی۔ انہوں نے سروس کے آغاز سے لے کر اقوام متحدہ کے انسراگ (UN-INSARAG) سرٹیفکیشن کے حصول اور ترکیہ میں زلزلے کے دوران بین الاقوامی سطح پر امدادی کارروائیوں میں شرکت تک کے سفر سے آگاہ کیا۔ انہوں نے محفوظ معاشروں کے قیام اور تمام شہریوں کو بروقت ہنگامی طبی امداد کی فراہمی یقینی بنانے کے سروس کے مشن کو بھی اجاگر کیا۔ ڈاکٹر رضوان نصیر نے اس امر پر زور دیا کہ ٹریفک حادثات روزمرہ کی ایک بڑی ہنگامی صورتحال بن چکے ہیں، جن سے نمٹنے کے لیے عوامی آگاہی، احتیاطی تدابیر اور مثر ایمرجنسی رسپانس نظام کو مزید مستحکم کرنا ضروری ہے۔ انہوں نے آفات کے خطرات کم کرنے کے لیے محفوظ تعمیرات، زلزلہ مزاحم عمارات،بلڈنگ کوڈز پر عمل درآمد اور زمین کے مثر استعمال کی منصوبہ بندی کی اہمیت پر بھی زور دیا۔ وفد کے ارکان نے ڈاکٹر رضوان نصیر سے تبادلہ خیال کرتے ہوئے ریسکیو 1122 کے آپریشنل ڈھانچے، تربیتی نصاب اور کارکردگی کے معیار سے متعلق مختلف سوالات کیے اور پاکستان کے ساتھ ادارہ جاتی تعاون اور مشترکہ تربیتی روابط کے فروغ میں گہری دلچسپی کا اظہار کیا۔ ڈاکٹر رضوان نصیر نے بین الاقوامی معیار کے مطابق خصوصی تربیت کی فراہمی کے لیے ہر ممکن تعاون کی یقین دہانی کروائی اور استعدادِ کار میں اضافے اور کمیونٹی سیفٹی کے فروغ کے لیے بین الاقوامی تعاون کو مزید مضبوط بنانے کی اہمیت پر زور دیا۔ بین الاقوامی وفد نے ریسکیو 1122 کے موثر آپریشنل نظام، پیشہ ورانہ معیار اور جدید تربیتی سہولیات کو سراہتے ہوئے پاکستان کے ایمرجنسی سروسز ماڈل کو دیگر ممالک کے لیے قابلِ تقلید قرار دیا۔ دورے کے اختتام پر وفد کی گروپ فوٹو بھی بنائی گئی۔