سی ٹی ڈی کارروائیاں’کالعدم تنظیموں سے تعلق رکھنے والے 8 دہشت گرد گرفتار

لاہور (کرائم رپورٹر) صوبہ پنجاب میں کائونٹر ٹیررازم ڈیپارٹمنٹ (سی ٹی ڈی) نے پنجاب کے مختلف علاقوں میں کارروائیوں کے دوران مختلف کالعدم تنظیموں سے تعلق رکھنے والے8 دہشت گردوں کو گرفتار کرکے دہشت گردی کا بڑا منصوبہ ناکام بنا دیا۔ ترجمان کے مطابق سی ٹی ڈی پنجاب نے دہشت گردی کے کسی بھی ناخوشگوار واقعے سے موثر انداز میں نمٹنے کے لیے صوبے کے مختلف اضلاع میں انٹیلی جنس پر مبنی 91 کارروائیاں کیں جن میں91 مشتبہ افراد سے پوچھ گچھ کی گئی اور 8 دہشت گردوں کو اسلحہ، دھماکہ خیز مواد اور دیگر ممنوعہ مواد سمیت گرفتار کیا۔ گرفتار دہشت گردوں میں شہزاد اکبر’ محمود علی’ نعمان’ عدنان’ فاروق’ رحمان’ ہمایوں شامل ہیں۔ ان گرفتار دہشت گردوں کا تعلق فتنہ الخوارج اور دیگر دہشت گرد تنظیموں سے ہے۔ گرفتار دہشت گردوں کا تعلق گجرانوالہ’ بہاولپور’ چنیوٹ’ راولپنڈی’ بھکر’ سرگودھا سے ہے۔ دھماکہ خیز مواد465 گرام، ڈیٹونیٹر3 سیفٹی فیوز وائر 20 فٹ’ ہینڈ گرنیڈ2 کالعدم تنظیم کے پمفلٹ، میگزین’ پرائمہ کارڈ’ موبائل فون اور نقدی دہشت گردوں کے قبضے سے برآمد کر لی ہے۔ ترجمان نے کہا کہ دہشت گرد مختلف علاقوں میں کاروائیاں کرکے دہشت پھیلانا چاہتے تھے۔ انہوں نے مزید کہا کہ گرفتار دہشت گردوں کے خلاف 7 مقدمات درج کرکے ان سے مزید تفتیش کی جارہی ہے۔ انہوں نے کہا کہ مقامی پولیس اور سکیورٹی اداروں کے تعاون سے 1484 کومبنگ آپریشنز بھی کیے گئے، 50865 افراد کو چیک کیا گیا، 77 مشتبہ افراد کو گرفتار کیا گیا، 65 ایف آئی آر درج کی گئیں اور 45 بازیابیاں کی گئیں۔ کائونٹر ٹیررازم ڈیپارٹمنٹ پنجاب مستعدی سے محفوظ پنجاب کے اپنے ہدف پر عمل پیرا ہے اور دہشت گردوں اور ریاست دشمن عناصر کو سلاخوں کے پیچھے پہنچانے کی کوششوں میں کوئی کسر نہیں چھوڑی جائے گی۔ انہوں نے کہا کہ کسی بھی متعلقہ معلومات کی صورت میں ہیلپ لائن پر کال کریں۔ کائونٹر ٹیررازم ڈیپارٹمنٹ پنجاب 0800 11111 پر۔