نادرا:جدیدموبائل رجسٹریشن نظام متعارف، خدمات گھر تک پہنچانے کا فیصلہ

اسلام آباد (این این آئی) نیشنل ڈیٹا بیس اینڈ رجسٹریشن اتھارٹی (نادرا) نے شہریوں کو رجسٹریشن اور شناختی خدمات ان کی دہلیز تک پہنچانے کے لیے جدید ٹیکنالوجی سے لیس ٹیبلٹ ڈیوائسز کے ذریعے موبائل رجسٹریشن نظام پر عملدرآمد شروع کر دیا ہے۔ نادرا حکام کے مطابق پاکستان میں تیار کردہ ان جدید ڈیوائسز میں پاک آئی ڈی سافٹ ویئر نصب ہے، جس کی مدد سے نادرا کے افسران مختلف علاقوں میں جا کر شہریوں کی رجسٹریشن سے متعلق خدمات فراہم کرسکتے ہیں۔ ان ڈیوائسز کے ذریعے شہریوں کے فنگر پرنٹس، تصاویر اور آنکھوں کی پتلی کے عکس حاصل کرنے کی سہولت بھی موجود ہے۔ حکام نے کہا کہ اس نظام کے تحت نادرا کی خدمات کو ضرورت کے مطابق مختلف علاقوں میں منتقل کیا جا سکے گا۔ بالخصوص ایسی یونین کونسلز میں جہاں شہریوں کا غیر معمولی رش ہو یا شناختی خدمات کے حصول کے لیے بڑی تعداد میں لوگ موجود ہوں، وہاں جدید ڈیوائس سے لیس افسر کو فوری طور پر تعینات کیا جاسکتا ہے۔ اس اقدام کا مقصد شہریوں کو رجسٹریشن کے لیے طویل انتظار اور دور دراز مراکز کا رخ کرنے کی زحمت سے بچانا اور شناختی خدمات کی فراہمی کو زیادہ مؤثر بنانا ہے۔ نادرا کے مطابق جدید بائیومیٹرک ٹیکنالوجی سے لیس یہ ڈیوائسز ضرورت کے مطابق مختلف علاقوں میں خدمات کی فراہمی میں معاون ثابت ہوں گی۔