وزارتِ قومی ورثہ کی 53 گاڑیوں پر 3 سال میں 7 کروڑ 24 لاکھ روپے خرچ

اسلام آباد (عادل عباسی) قومی اسمبلی میں رکن عالیہ کامران کے سوال پر وزارتِ قومی ورثہ و ثقافت ڈویژن کی جانب سے پیش کردہ تفصیلات کے مطابق وزارت اور اس کے ماتحت اداروں کی 53 سرکاری گاڑیوں پر مالی سال 2023-24 سے 2025-26 کے دوران 7 کروڑ 24 لاکھ 38 ہزار روپے سے زائد خرچ ہوئے۔ ان میں 5 کروڑ 18 لاکھ 32 ہزار روپے ایندھن جبکہ 2 کروڑ 6لاکھ 6 ہزار روپے مرمت و دیکھ بھال پر صرف ہوئے۔ یوں گاڑیوں پر ماہانہ اوسطا 20 لاکھ روپے سے زائد خرچ کیے گئے۔دستاویزات کے مطابق پاکستان نیشنل کونسل آف دی آرٹس، وزارت کے مرکزی دفتر، محکمہ آثارِ قدیمہ اور لوک ورثہ نے مجموعی اخراجات کا تقریبا 81 فیصد استعمال کیا۔ وزارت کے مرکزی دفتر کی صرف چھ گاڑیوں پر تین سال میں ایک کروڑ 54 لاکھ روپے سے زائد خرچ ہوئے، جو فی گاڑی اوسطا 71 ہزار روپے ماہانہ بنتا ہے۔ ان گاڑیوں میں 2025 ماڈل کی ٹویوٹا آلٹس بھی شامل ہے، جس کے باوجود مرمت کے اخراجات میں مسلسل اضافہ ریکارڈ کیا گیا۔پاکستان نیشنل کونسل آف دی آرٹس کی 12 گاڑیوں پر تقریبا 2 کروڑ 19 لاکھ 60 ہزار روپے خرچ ہوئے، جن میں ایک کروڑ 82 لاکھ 59 ہزار روپے ایندھن کی مد میں ادا کیے گئے۔ محکمہ آثارِ قدیمہ و عجائب گھر کی سات گاڑیوں پر ایک کروڑ 27 لاکھ 63 ہزار روپے خرچ ہوئے، جبکہ مرمت کے اخراجات 2024-25 میں تقریبا ایک لاکھ 31 ہزار روپے سے بڑھ کر 2025-26 میں 18 لاکھ 26 ہزار روپے تک پہنچ گئے۔لوک ورثہ کی آٹھ گاڑیوں پر 86 لاکھ 24 ہزار روپے خرچ کیے گئے، جن میں 1984، 1987 اور 1996 ماڈل کی گاڑیاں بھی شامل ہیں۔ ادارے کے مجموعی اخراجات کا تقریبا 41 فیصد مرمت پر صرف ہوا، جبکہ ایک گاڑی ناقابل استعمال بتائی گئی ہے۔ اسی طرح قومی زبان کے ادارے کی چار پرانی گاڑیوں پر تین سال میں 39 لاکھ 35 ہزار روپے خرچ ہوئے، جن میں 18 لاکھ 48 ہزار روپے مرمت کی مد میں شامل ہیں۔دستاویزات میں اکادمی ادبیات پاکستان کی فہرست میں ایک ہی رجسٹریشن نمبر دو مرتبہ درج ہونے، قائداعظم اکیڈمی کی ناقابل استعمال گاڑی کے باوجود مرمت پر اخراجات، جبکہ ایوانِ اقبال کمپلیکس کی تین گاڑیوں کے ایندھن اور مرمت کے اخراجات درج نہ ہونے جیسے امور بھی سامنے آئے ہیں۔ قومی ادارہ فروغِ قومی زبان کے مرمتی اخراجات میں بھی سال بہ سال غیر معمولی اتار چڑھا دیکھا گیا۔قابلِ ذکر امر یہ ہے کہ قومی اسمبلی میں ہر گاڑی کے الگ الگ اخراجات کی تفصیلات طلب کی گئی تھیں، تاہم جواب میں زیادہ تر ادارہ وار مجموعی اعداد و شمار فراہم کیے گئے۔ اس وجہ سے یہ واضح نہیں ہو سکا کہ کس گاڑی پر کتنا ایندھن استعمال ہوا اور مرمت پر کتنی رقم خرچ کی گئی۔