BISP ،یو این ویمن اور عالمی ادارہ خوراک کا خواتین تحفظ کیلئے عزم کا اعادہ

اسلام آباد(نامہ نگار خصوصی )بینظیر انکم سپورٹ پروگرام، یو این ویمن اور عالمی ادارہ خوراک نے پاکستان میں صنفی مساوات اور خواتین کو بااختیار بنانے کے لیے مشترکہ اعلامیے پر دستخط کیے ہیں۔ اس شراکت داری کا مقصد خواتین کو صرف مالی امداد فراہم کرنا ہی نہیں بلکہ انہیں اپنے حقوق سے آگاہ کرنا، فیصلہ سازی میں ان کا کردار بڑھانا اور معاشی سرگرمیوں میں ان کی شرکت کے مواقع پیدا کرنا بھی ہے۔بینظیر کفالت پروگرام کے تحت ایک کروڑ سے زائد خواتین کو ہر تین ماہ بعد مالی معاونت فراہم کی جا رہی ہے۔ بی آئی ایس پی ملک بھر میں خواتین تک براہِ راست پہنچنے کا ایک اہم ذریعہ ہے۔ اس شراکت داری کے ذریعے خواتین کو اپنے حقوق اور دستیاب سہولیات سے آگاہ کرنے، امدادی مراکز پر ان کی عزت، رازداری اور تحفظ کو یقینی بنانے اور انہیں ہنر سیکھنے، روزگار اور مالی خودمختاری کے مواقع فراہم کرنے پر توجہ دی جائے گی۔*چیئرپرسن بی آئی ایس پی سینیٹر روبینہ خالد نے کہا کہ بی آئی ایس پی خواتین کے لیے ایسا سماجی تحفظ فراہم کرنے کے لیے پرعزم ہے جو ان کی ضروریات کو مدنظر رکھے، انہیں معاشی طور پر خودمختار بنائے اور مخصوص صلاحیت کے حامل افراد کے لیے بھی خدمات تک آسان اور بہتر رسائی یقینی بنائے۔ یو این ویمن اور عالمی ادارہ خوراک کے ساتھ شراکت داری سے سماجی تحفظ کی خدمات کو مزید محفوظ، قابلِ رسائی اور خواتین سمیت کمزور طبقات کی ضروریات کے مطابق بنانے میں مدد ملے گی۔**انہوں نے مزید کہا کہ مشترکہ کوششوں کے ذریعے خواتین کو اپنے حقوق اور سہولیات کے بارے میں آگاہی دینے، رہنمائی فراہم کرنے، ماں اور بچے کی صحت بہتر بنانے اور بینظیر نشوونما مراکز میں خدمات کا معیار بہتر کرنے پر توجہ دی جائے گی۔ خواتین کے لیے ہنر سیکھنے، روزگار، کاروبار شروع کرنے اور مالی و ڈیجیٹل سہولیات تک رسائی کے مواقع بھی بڑھائے جائیں گے۔ اس کے ساتھ خواتین عملے کے تحفظ اور خاندان میں دیکھ بھال کی ذمہ داریاں مشترکہ طور پر ادا کرنے کی حوصلہ افزائی کی جائے گی۔ اداروں کے درمیان رابطے اور تعاون کو بہتر بنا کر زیادہ مثر نتائج حاصل کرنے کی کوشش کی جائے گی تاکہ خواتین معاشی طور پر خودمختار ہو سکیں اور ملک بھر میں بی آئی ایس پی سے مستفید ہونے والی خواتین کی زندگی آسان بنائی جا سکے۔*پاکستان میں یو این ویمن کے نمائندے مسٹر جمشید ایم کاظی نے کہا کہ سماجی تحفظ صنفی مساوات کے فروغ کا ایک اہم ذریعہ ہے، خاص طور پر جب اسے خواتین کی ضروریات اور ان کی رائے کو مدنظر رکھتے ہوئے ترتیب دیا جائے۔ پاکستان نے خواتین کو مالی معاونت فراہم کرنے کے لیے ایک بڑا پروگرام قائم کیا ہے۔ ہماری مشترکہ کوشش ہے کہ یہ نظام مالی امداد سے آگے بڑھ کر خواتین کی آواز کو مضبوط کرے، ان کے تحفظ کو یقینی بنائے اور انہیں معاشی فیصلے کرنے کے زیادہ مواقع فراہم کرے۔ اس مقصد کے لیے مردوں اور خاندانوں کو بھی ساتھ لے کر چلنا ضروری ہے۔پاکستان میں عالمی ادارہ خوراک کی نمائندہ اور کنٹری ڈائریکٹر محترمہ انیتا ہرش نے کہا کہ بہتر غذائیت کا خواتین کی صحت، فلاح و بہبود اور اپنے اور اپنے خاندان کے لیے فیصلے کرنے کی صلاحیت سے گہرا تعلق ہے۔ بینظیر نشوونما پروگرام کے ذریعے عالمی ادارہ خوراک اور بی آئی ایس پی خواتین اور چھوٹے بچوں کو زندگی کے ایک اہم مرحلے میں مدد فراہم کر رہے ہیں۔ یو این ویمن کے ساتھ شراکت داری اس کام کو مزید آگے بڑھائے گی۔ خواتین کو خدمات حاصل کرنے میں پیش آنے والی رکاوٹیں دور کرنے اور پروگرام پر عمل درآمد کے دوران ان کی عزت، تحفظ اور ضروریات کا خیال رکھنے پر توجہ دی جائے گی۔یہ شراکت داری اقوامِ متحدہ کے پائیدار ترقی کے اہداف سے بھی ہم آہنگ ہے، جن میں غربت کا خاتمہ (ایس ڈی جی 1)، بھوک کا خاتمہ (ایس ڈی جی 2) اور صنفی مساوات کا فروغ (ایس ڈی جی 5) شامل ہیں۔ اس کے ساتھ یہ پاکستان کے لیے اقوامِ متحدہ کے پائیدار ترقیاتی تعاون کے فریم ورک میں بھی معاون ثابت ہوگی۔اس شراکت داری کے تحت تینوں اداروں کے درمیان مشترکہ منصوبہ بندی، رابطے اور اقدامات پر عمل درآمد کو بہتر بنانے کے لیے ایک ورکنگ گروپ قائم کیا جائے گا۔ چاروں صوبوں میں بینظیر نشوونما کے 12 مراکز تک کا جائزہ لیا جائے گا تاکہ خواتین کی عزت، رازداری، تحفظ، مراکز تک رسائی اور خدمات کے معیار کو بہتر بنایا جا سکے۔ اس مقصد کے لیے رہنما اصول اور چیک لسٹ تیار کی جائے گی، جنہیں پہلے منتخب مراکز میں آزمایا جائے گا اور بعد میں مزید مراکز تک وسعت دی جائے گی۔نشوونما پروگرام میں کام کرنے والی خواتین عملے کی ضروریات کا بھی جائزہ لیا جائے گا۔ اس میں کام کی جگہ پر تحفظ، ہراسانی سے بچا، آمدورفت، کام کے بوجھ اور ترقی کے مواقع جیسے امور شامل ہوں گے۔ بی آئی ایس پی اور نشوونما پروگرام کی خواتین بینیفشریز کو ان کے حقوق، دستیاب سہولیات اور سرکاری خدمات کے بارے میں آگاہی اور رہنمائی فراہم کی جائے گی۔شراکت داری کے تحت مردوں اور خاندانوں کو بھی شامل کیا جائے گا تاکہ گھر میں دیکھ بھال کی ذمہ داریاں مشترکہ طور پر ادا کرنے، ماں اور بچے کی بہتر غذائیت اور گھریلو فیصلوں میں خواتین کے کردار کو فروغ دیا جا سکے۔ خواتین کو ہنر سیکھنے، روزگار، کاروبار شروع کرنے اور مالی و ڈیجیٹل سہولیات سے فائدہ اٹھانے کے مواقع فراہم کرنے کے لیے بھی اقدامات کیے جائیں گے۔اس کے علاوہ، بی آئی ایس پی کی صنفی مساوات سے متعلق حکمتِ عملی کو حتمی شکل دینے، خواتین کی زندگیوں پر بی آئی ایس پی کے اثرات کو دستاویزی شکل دینے اور خواتین کے ہنر اور بااختیاری کے پروگراموں کے لیے مشترکہ آگاہی، وکالت اور وسائل جمع کرنے میں تکنیکی معاونت فراہم کی جائے گی۔ ان اقدامات کے ذریعے تینوں ادارے خواتین کو بہتر سماجی تحفظ فراہم کرنے، ان کے حقوق کے بارے میں آگاہی بڑھانے اور انہیں معاشی طور پر خودمختار بنانے کے لیے مل کر کام کریں گے۔