جامعات قومی معیشت کی ترقی میں کلیدی کردار ادا کریں: احسن اقبال

اسلام آباد (نامہ نگار خصوصی)وفاقی وزیر برائے منصوبہ بندی، ترقی و خصوصی اقدامات احسن اقبال نے کہا ہے کہ جامعات کو ٹیکنالوجی، تحقیق اور جدت کے فروغ کے ذریعے قومی معیشت کی ترقی کا محرک بننا چاہیے۔ نوجوان پاکستان کی معاشی تبدیلی میں کلیدی کردار ادا کر سکتے ہیں۔وہ نیشنل یونیورسٹی آف سائنسز اینڈ ٹیکنالوجی (نسٹ)کے مرکزی کیمپساسلام آباد میں منعقدہ ماسٹرز کانووکیشن 2026 سے بطور مہمانِ خصوصی خطاب کر رہے تھے۔ تقریب میں 66 پی ایچ ڈی اسکالرز کو ڈگریاں عطا کی گئیں، جبکہ 26 انڈرگریجویٹ طلبہ کو صدارتی طلائی اور 28 کو چانسلر کے چاندی کے تمغوں سے نوازا گیا۔نسٹ کے ریکٹر ڈاکٹر محمد زاہد لطیف نے فارغ التحصیل طلبہ، ان کے والدین اور اساتذہ کو مبارک باد دیتے ہوئے کہا کہ تعلیمی سفر کی تکمیل عملی زندگی کے نئے چیلنجز کا آغاز ہے۔ انہوں نے طلبہ کی کامیابی میں والدین کی قربانیوں کو سراہتے ہوئے کہا کہ نسٹ طلبہ کو تعلیمی مہارت کے ساتھ معاشرتی خدمت کے لیے بھی تیار کرتی ہے۔ تیزی سے بدلتی دنیا میں کامیابی کے لیے محض علم کافی نہیں، بلکہ دیانت داری، اعلی اخلاقی اقدار اور قائدانہ صلاحیتیں بھی ضروری ہیں۔ مصنوعی ذہانت اور جدید ٹیکنالوجی کے دور میں نسٹ طلبہ کی صلاحیتوں کو نکھارنے اور انہیں مستقبل کے تقاضوں سے ہم آہنگ کرنے پر توجہ دے رہی ہے۔خواتین فارغ التحصیل طلبہ کی حوصلہ افزائی کرتے ہوئے ریکٹر نے کہا کہ نسٹ خواتین کو بااختیار بنانے اور انہیں مختلف شعبوں میں قائدانہ کردار ادا کرنے کے مواقع فراہم کرنے کے لیے پرعزم ہے۔ انہوں نے فارغ التحصیل طلبہ پر زور دیا کہ وہ معاشرے میں مثبت تبدیلی لانے اور ملک کی ترقی میں اپنا کردار ادا کریں۔احسن اقبال نے کہا کہ پاکستان کو برآمدات، فی کس آمدنی اور جدید ٹیکنالوجی کے استعمال کے شعبوں میں اہم چیلنجز درپیش ہیں۔ اڑان پاکستان پروگرام کی اولین ترجیح برآمدات میں اضافہ ہے، جس کے لیے جامعات کو تحقیق، جدت اور ٹیکنالوجی کے فروغ میں قائدانہ کردار ادا کرنا ہوگا۔ انہوں نے کہا کہ ملک کی ترقی کے لیے اصلاحات کے ساتھ پرامن اور مستحکم ماحول بھی ضروری ہے۔وفاقی وزیر نے فارغ التحصیل طلبہ پر زور دیا کہ وہ عملی زندگی میں دیانت داری، عزم اور محنت کو شعار بنائیں اور اپنی صلاحیتیں پاکستان کی ترقی و خوشحالی کے لیے بروئے کار لائیں۔ انہوں نے والدین کی قربانیوں کو سراہتے ہوئے کہا کہ افراد کی پہچان معاشرے کے لیے ان کی خدمات سے ہوتی ہے۔نسٹ کے ریکٹر ڈاکٹر محمد زاہد لطیف نے خطاب کرتے ہوئے کہا کہ جامعہ طلبہ کو تعلیمی مہارت کے ساتھ اخلاقی اقدار، قائدانہ صلاحیتوں اور معاشرتی خدمت کے جذبے سے آراستہ کرنے کے لیے پرعزم ہے۔ انہوں نے خواتین فارغ التحصیل طلبہ کی حوصلہ افزائی کرتے ہوئے معاشرے میں مثبت تبدیلی لانے پر زور دیا۔تقریب کے ساتھ ہی نسٹ کانووکیشن ویک 2026کا آغاز ہوگیا۔