کامسیٹس نے تقریب میں بہترین اساتذہ کو اعزاز سے نوازا

اسلام آباد(نامہ نگار خصوصی )کامسیٹس یونیورسٹی اسلام آباد میں ہائر ایجوکیشن کمیشن (HEC) کے بہترین یونیورسٹی ٹیچر ایوارڈ 2025-26 (BUTA)کی تقریبِ تقسیمِ انعامات جمعہ کے روز لائبریری آڈیٹوریم میں منعقد ہوئی۔ تقریب میں تدریسی مہارت کو سراہتے ہوئے اعلیٰ تعلیم کے شعبے میں نمایاں خدمات انجام دینے والے اساتذہ کو اعزاز پیش کیا گیا۔کامسیٹس یونیورسٹی اسلام آباد کے ریکٹر، پروفیسر ڈاکٹر راحیل قمر، تمغہ امتیاز ،تقریب کے مہمانِ خصوصی تھے۔ اساتذہ کے دیرپا اثرات پر روشنی ڈالتے ہوئے انہوں نے بتایا کہ کس طرح ان کے اپنے ایک استاد نے ان کی زندگی کی تشکیل میں اہم کردار ادا کیا۔ انہوں نے اساتذہ پر زور دیا کہ وہ طلبہ سے براہِ راست رابطے، فعال اندازِ تعلم اور مصنوعی ذہانت (AI) کے موثر استعمال کے ذریعے ٹیچنگ 5.0 کو اپنائیں۔ انہوں نے واضح کیا کہ مصنوعی ذہانت کو اساتذہ کا متبادل بنانے کے بجائے تدریس میں ان کی معاونت کے لیے استعمال کیا جانا چاہیے۔تقریب کے دوران درج ذیل ایوارڈ یافتہ افرادمیں اسناد اور نقد انعامات تقسیم کیے گئے۔BUTA 2025 : پروفیسر ڈاکٹر نادیہ نواز (فاتح)، پروفیسر ڈاکٹر خرم سلیم عالمگیر (پہلی پوزیشن کے رنر اپ)اور پروفیسر ڈاکٹر محمد اویس جاوید )دوسری پوزیشن کے رنر اپ(۔BUTA 2026 :پروفیسر ڈاکٹر فہد منیر عباسی (فاتح)، پروفیسر ڈاکٹر ثاقب ضیا (پہلی پوزیشن کے رنر اپ)اور پروفیسر ڈاکٹر احمد نسیم علوی (دوسری پوزیشن کے رنر اپ)۔دونوں فاتحین نے بھی اپنے تجربات بیان کیے اور ان اساتذہ کو خراجِ تحسین پیش کیا جنہوں نے انہیں تدریس کے شعبے کو بطور پیشہ اختیار کرنے کی ترغیب دی۔ انہوں نے یونیورسٹی، اپنے ساتھیوں اور طلبہ کی جانب سے ملنے والے تعاون پر اظہارِ تشکر کیا۔ہائر ایجوکیشن کمیشن(HEC) کا بہترین یونیورسٹی ٹیچر ایوارڈ یونیورسٹی سطح پر تدریس میں نمایاں کارکردگی کے اعتراف میں دیا جاتا ہے اور مستقبل کی نسلوں کی تشکیل میں اساتذہ کے اہم کردار کو اجاگر کرتا ہے۔ کامسیٹس یونیورسٹی اسلام آباد میں اساتذہ کی نامزدگیوں کا جائزہ یونیورسٹی کے مقررہ انتخابی طریقہ کار کے تحت، HEC کے BUTA فریم ورک کے مطابق لیا جاتا ہے۔ اس فریم ورک میں تدریسی فلسفہ، کورس کی منصوبہ بندی، جانچ و تشخیص، کلاس روم میں تدریسی طریقے، ٹیکنالوجی کا استعمال، طلبہ کی رہنمائی اور ان کی آرا ء سمیت تدریس کے مختلف پہلوں کو مدِنظر رکھا جاتا ہے۔یہ تقریب تدریسی معیار کو سراہنے، جدید تدریسی طریقوں کے فروغ اور اعلی تعلیم کے معیار کو مزید بہتر بنانے کے لیے کامسیٹس یونیورسٹی اسلام آباد کے عزم کی تجدید کا باعث بنی۔ تقریب کا اختتام کلماتِ تشکر اور گروپ فوٹو کے ساتھ ہوا۔