لسبیلہ : بس ‘ وین میں خوفناک تصادم’ 12افراد جاں بحق’ 22زخمی

کوئٹہ(ویب ڈیسک) بلوچستان کے ضلع لسبیلہ میں اوتھل پوائنٹ کے قریب مسافر بس اور وین کے درمیان خوفناک تصادم کے نتیجے میں 12 افراد جاں بحق ہوگئے۔پولیس ذرائع نے تصدیق کی ہے کہ حادثے کا شکار ہونے والی بس لسبیلہ سے
کراچی جا رہی تھی۔ اوتھل پوائنٹ کے قریب دونوں گاڑیوں کے درمیان تصادم ہوا جس کے نتیجے میں بھاری جانی نقصان ہوا۔واقعے کی اطلاع ملتے ہی پولیس، ریسکیو ٹیمیں ضلعی انتظامیہ اور مقامی افراد موقع پر پہنچ گئے۔ زخمیوں کو فوری طور پر ایمبولینسز کے ذریعے قریبی اسپتال منتقل کیا گیا۔انچارج ایدھی لسبیلہ ڈاکٹر عبدالحکیم لاسی کے مطابق زخمی ہونے والے 22 افراد میں سے 7 کی حالت تشویش ناک ہے، جنہیں ٹراما سینٹر کراچی منتقل کر دیا گیا۔پولیس نے بتایا کہ زخمیوں کو طبی امداد فراہم کی جا رہی ہے اور ان کی حالت کے بارے میں تفصیلات بعد میں سامنے آئیں گی۔ پولیس کے مطابق حادثے کی وجوہات کا تعین کرنے کے لیے تحقیقات شروع کر دی گئی ہیں۔قومی شاہراہ پر ٹریفک کی روانی متاثر ہوئی تھی جسے پولیس نے بحال کرنے کی کوششیں جاری رکھیں۔
بس تصادم