متروکہ وقف املاک بورڈ’ لاہور’ ننکانہ سے قیمتی پراپرٹیز واگزار

لاہور ( خبر نگار)متروکہ وقف املاک بورڈ نے غیر قانونی قابضین کے خلاف کارروائی کرتے ہوئے لاہور اور ننکانہ زون میں قیمتی ٹرسٹ پراپرٹیز واگزار کرا لیں۔ کارروائی چیئرمین متروکہ وقف املاک بورڈ قمر الزمان کی ہدایات پر عمل میں لائی گئی
، جس کے دوران متعدد کمرشل دکانوں اور قیمتی اراضی کا قبضہ حاصل کر کے وہاں بورڈ کے سکیورٹی اہلکار تعینات کر دیے گئے۔ننکانہ زون میں ایڈمنسٹریٹر تنویر حسین اور ڈپٹی ایڈمنسٹریٹر عمر جاوید اعوان کی زیر نگرانی سنت رام روڈ، بچیانہ روڈ اور واربرٹن بائی پاس پر کارروائی کی گئی۔ آپریشن کے دوران 18 کمرشل دکانیں اور مجموعی طور پر 30 مرلہ رقبے پر مشتمل4پراپرٹیز واگزار کروائی گئیں۔ڈپٹی ایڈمنسٹریٹر ننکانہ عمر جاوید اعوان نے رات کے وقت غیر قانونی تعمیر کی اطلاع ملنے پر مقامی پولیس اور سکیورٹی عملے کے ہمراہ فوری طور پر موقع پر پہنچ کر کارروائی کی۔ غیرقانونی تعمیرات کو مسمار کر کے ٹرسٹ پراپرٹی کا قبضہ حاصل کر لیا گیا۔ دوسری جانب لاہور زون میں ایڈمنسٹریٹر عدنان حسن پھلروان کی زیر نگرانی کارروائیاں کی گئیں۔ ڈپٹی ایڈمنسٹریٹر ون سمیرا رضوی نے مصری شاہ کے علاقے وول پریس میں آپریشن کرتے ہوئے 18 دکانیں غیر قانونی قابضین سے واگزار کروائیں، جبکہ ایبک روڈ پر مزید 3 دکانیں بھی واگزار کروا لی گئیں۔ لاہور زون کے ڈپٹی ایڈمنسٹریٹر ٹو سہیل غنی نے انسپکٹر گلشاد اور دیگر عملے کے ہمراہ مانگا بائی پاس مین روڈ پر کارروائی کرتے ہوئے تقریبا 13 کروڑ روپے مالیت کی 13 کمرشل دکانیں غیر قانونی قابضین سے واگزار کروائیں۔اسی طرح لاہور زون کے ضلع قصور میں ڈپٹی ایڈمنسٹریٹر عاصم اعجاز نے سٹاف اور سیکیورٹی اہلکاروں کے ہمراہ کارروائی کرتے ہوئے مجموعی طور پر تقریبا 10 کروڑ روپے مالیت کی 47 دکانیں غیر قانونی قابضین سے واگزار کروا لیں۔ علاوہ ازمیں متروکہ وقف املاک بورڈ کے ملتان ،گجرات ،کراچی اور دیگر اضلاع میں میں غیر قانونی قابضین کے خلاف کارروائی کر کے اراضی واگزار کرائی گئی۔ واگزار کروائی گئی تمام پراپرٹیز پر متروکہ وقف املاک بورڈ کے سکیورٹی اہلکار تعینات کر دیے گئے ہیں تاکہ دوبارہ قبضے یا غیرقانونی تعمیرات کی کوشش کو روکا جا سکے۔