کراچی میں مختلف مقامات پر پولیس مقابلے،9زخمیوں سمیت 10 مبینہ ڈاکو گرفتار

کراچی (این این آئی) شہر قائد کے مختلف علاقوں میں پولیس کے مبینہ مقابلوں اور کارروائیوں کے دوران مجموعی طور پر 9 زخمیوں سمیت 10 مبینہ ڈاکوؤں کو گرفتار کر لیا گیا۔ پولیس کے مطابق گرفتار ملزمان کے قبضے سے اسلحہ اور دیگر سامان برآمد ہوا ہے جبکہ زخمی ملزمان کو طبی امداد کے لیے جناح اور عباسی شہید ہسپتالوں میں منتقل کر دیا گیا۔ واقعات سے متعلق مزید تفتیش جاری ہے۔ تفصیلات کے مطابق بن قاسم پولیس کا سٹیل مل پل کے قریب مبینہ مقابلہ ہوا جس کے دوران ایک ملزم زخمی حالت میں گرفتار کرلیا گیا۔ ملزم کی شناخت 19سالہ زاہد کے نام سے ہوئی جسے طبی امداد کے لیے جناح ہسپتال منتقل کردیا گیا۔ پولیس نے ملزم کے قبضے سے اسلحہ برآمد کرنے کا دعویٰ کیا ہے۔ دوسری جانب فیروز آباد پولیس اور شاہین فورس نے ہل پارک کے قریب مبینہ مقابلے کے دوران دو ملزمان کو شدید زخمی حالت میں گرفتار کیا۔ پولیس کے مطابق ملزمان کے قبضے سے اسلحہ، چھینا گیا سامان، موبائل فونز، نقدی اور موٹر سائیکل برآمد ہوئی۔ دونوں زخمی ملزمان کو جناح ہسپتال منتقل کر دیا گیا۔ ادھر نیو کراچی انڈسٹریل ایریا میں سیکٹر الیون جی منگل بازار کے قریب پولیس مقابلے میں ایک مبینہ ڈاکو زخمی حالت میں گرفتار ہوا جس کی شناخت مولاداد کے نام سے ہوئی۔