سی سی ڈی پنجاب’ جرائم پیشہ عناصر کیخلاف کارروائیوں کیساتھ عوامی خدمت کیلئے بھی سرگرم

لاہور (کرائم رپورٹر) سی سی ڈی پنجاب جرائم پیشہ عناصر کے خلاف کارروائیوں کے ساتھ ساتھ
عوامی خدمت میں بھی پیش پیش ہے۔ سی سی ڈی انسدادِ اغواء برائے تاوان سیل لاہور نے مختلف علاقوں میں موثر کارروائیاں کرتے ہوئے 6 گمشدہ بچوں کو تلاش کرکے بحفاظت ان کے والدین کے حوالے کر دیا۔ ترجمان سی سی ڈی کے مطابق دو بچوں کے اغوا کے مقدمات تھانہ کوٹ لکھپت اور تھانہ فیکٹری ایریا میں درج تھے جبکہ بچوں کے اغواء سے متعلق خبریں مختلف نیوز چینلز پر بھی نشر ہوئی تھیں۔ بچوں کے والدین نے تلاش اور بازیابی کے لیے سی سی ڈی سے مدد کی اپیل کی، جس پر فوری کارروائی عمل میں لائی گئی۔ ترجمان نے بتایا کہ بازیاب ہونے والے بچوں کا تعلق لاہور، قصور، گوجرانوالہ اور ننکانہ صاحب سے ہے۔ بچوں کی بحفاظت واپسی پر والدین کو ان کے پیارے مل گئے، جس سے ان کی پریشانی اور بے چینی خوشی میں بدل گئی۔