اسرائیل میں ریکارڈ ووٹنگ؛ نیتن یاہو کی پریشانی بڑھ گئی’اپوزیشن رہنما پر مبینہ حملہ’چاقو بردار شخص گرفتار

لاہور(مانیٹرنگ ڈیسک)اسرائیل کے پارلیمانی انتخابات میں ابتدائی گھنٹوں کے دوران ریکارڈ ووٹنگ نے سیاسی مقابلہ دلچسپ بنا دیا جبکہ وزیرِاعظم بنیامن نیتن یاہو نے حامیوں سے بڑی تعداد میں ووٹ ڈالنے کی اپیل کی ہے۔اسرائیل کے مرکزی الیکشن کمیشن کے مطابق پولنگ کے پہلے سات گھنٹوں میں 44.9 فیصد اہل ووٹرز نے اپنا حقِ رائے دہی استعمال کیا جو ووٹنگ کی شرح کا نیا ریکارڈ ہے۔اسرائیل کے شہر تل ابیب میں حزبِ اختلاف کے رہنما یائر گولان کے قریب چاقو لے کر پہنچنے والے 20 سالہ شخص کو گرفتار کر لیا گیا۔بی بی سی اردو کے مطابق یہ واقعہ اس وقت پیش آیا جب ڈیموکریٹک پارٹی کے سربراہ گولان انتخابی مہم کے دوران شہریوں کو ووٹ ڈالنے کی ترغیب دے رہے تھے۔بعد ازاں مجموعی ٹرن آٹ 74 فیصد تک پہنچ گیا۔ کنیسٹ کی 120 نشستوں کے لیے 73 لاکھ سے زائد افراد ووٹ ڈالنے کے اہل ہیں۔انتخابی تجزیہ کاروں کے مطابق ووٹرز کی غیر معمولی شرکت کے انتخابی نتائج پر اثرات کا اندازہ لگانا قبل از وقت ہے۔تاہم فلسطینی النسل اسرائیلی شہریوں کی بڑی تعداد میں شرکت نیتن یاہو کے دائیں بازو کے اتحاد کے لیے مشکلات پیدا کر سکتی ہے۔ان کے مخالفین کو حکومت بنانے کے لیے عرب جماعتوں کی حمایت حاصل کرنے کے امکانات بڑھ سکتے ہیں۔ووٹنگ کے دوران نیتن یاہو نے اپنے حامیوں کو پولنگ اسٹیشنوں پر پہنچنے کی اپیل کرتے ہوئے کہا کہ بائیں بازو کے مخالفین اور عرب اسرائیلی شہریوں میں ووٹ ڈالنے کی شرح زیادہ ہے۔