قومی اسمبلی نے 27اکتوبر یوم سیاہ پر کشمیری عوام سے اظہار یکجہتی کی قرارداد منظور

اسلام آباد(نیوز ایجنسیاں ) قومی اسمبلی نے 27اکتوبر یوم سیاہ پر کشمیری عوام سے اظہار یکجہتی کی قرارداد منظور کرلی جبکہ کراچی میں کے الیکٹرک کی غیر اعلانیہ لوڈشیڈنگ، شرحِ سود کے خاتمے سے متعلق توجہ دلا نوٹسز کے علاوہ متعدد اہم بلوں کی منظوری بھی دیدی گئی۔قومی اسمبلی کا اجلاس ڈپٹی سپیکر سید غلام مصطفی شاہ کی صدارت میں منعقد ہوا۔ اجلاس کے آغاز پر چیئرمین کشمیر کمیٹی قاسم نون نے مقبوضہ کشمیر میں بھارتی مظالم کے خلاف اور کشمیری عوام سے یکجہتی کے متعلق قرارداد مشترکہ طور پر پیش کی جسے ایوان نے متفقہ طور پر منظور کر لیا۔ قرارداد میں 27اکتوبر 1947 کو بھارتی جارحیت کا سیاہ ترین دن قرار دیا گیا اور اقوامِ متحدہ کی قراردادوں کے مطابق کشمیریوں کو ان کا بنیادی حقِ خودارادیت دینے پر زور دیا گیا۔ایوان نے کشمیریوں کی بے مثال قربانیوں کو خراجِ تحسین پیش کرتے ہوئے عالمی برادری سے بھارتی مظالم کا فوری نوٹس لینے کا مطالبہ کیا اور اعادہ کیا کہ پاکستان اپنے کشمیری بہن بھائیوں کی سیاسی، اخلاقی اور سفارتی حمایت جاری رکھے گا۔ وفاقی وزیر امور کشمیر و گلگت بلتستان امیر مقام نے اظہار خیال کرتے ہوئے کہا کہ بھارت تقریباً گزشتہ 80سال سے کشمیری عوام پر ظلم کر رہا ہے، ہزاروں افراد کو اب تک شہید کیا جا چکا ہے، تقریبا 7 ہزار کشمیریوں کو جیل میں شہید کیا گیا، کشمیری اپنے موقف پر ڈٹے ہوئے ہیں اور ایک انچ پیچھے نہیں ہٹے۔ اجلاس میں کراچی میں جاری غیر اعلانیہ لوڈشیڈنگ اور کے الیکٹرک کی خراب کارکردگی سے متعلق ایم کیو ایم پاکستان کے رکن سید امین الحق نے توجہ دلائو نوٹس پیش کرتے ہوئے کہا کہ کے الیکٹرک کا شمار ان کمپنیوں میں ہوتا جسے عوام میں نفرت کی نگاہ سے دیکھا جاتا ہے، کے الیکٹرک ایک مافیا کے طور پر کام کرہا ہے۔ڈپٹی سپیکر نے معاملہ توانائی کی قائمہ کمیٹی کے سپرد کردیا۔پی ٹی آئی کی رکن شاندانہ گلزار نے انسداد زنا بالجبر تفتیش اور سماعت مقدمہ بل 2024 منظوری کے لیے قومی اسمبلی میں پیش کیا۔وزیر قانون نے بل کی مخالفت کر دی اور کہا کہ نیشنل پولیس بیورو میں نظام پہلے سے موجود ہے، زنا بالجبر سے متعلق تمام کیسز کا ٹریک اینڈ ٹریس سسٹم موجود ہے، بل کو مزید غور و خوض کیلئے قائمہ کمیٹی کے سپرد کردیا گیا۔علاوہ ازیں، جمیعت علمائے اسلام (ف ) کی رکن نعیمہ کشور نے ملک میں شرحِ سود کی موجودہ سطح سے متعلق توجہ دلا نوٹس پیش کرتے ہوئے حکومت کی معاشی پالیسیوں کو آڑے ہاتھوں لیا۔اس موقع پر پارلیمانی رپورٹرز اور صحافیوں نے نجی میڈیا ہاسز کی جانب سے صحافیوں کو وقت پر تنخواہوں کی عدم ادائیگی پر احتجاج ریکارڈ کراتے ہوئے نہ صرف قومی اسمبلی سے واک آئوٹ کیا بلکہ اجلاس کی کوریج روکنے کے بعد پریس گیلری بھی خالی کردی۔
قومی اسمبلی