اسلام آباد میں ٹریفک قوانین کی خلاف ورزی پر ریکارڈ چالان

اسلام آباد (حبہ عباسی) وفاقی دارالحکومت میں اسلام آباد ٹریفک پولیس نے مالی سال 2025-26 کے دوران ٹریفک قوانین کی خلاف ورزیوں پر تاریخ کی سب سے بڑی کارروائی کی ہے۔ سرکاری اعداد و شمار کے مطابق یکم جولائی 2025 سے 30 جون 2026 تک کے دوران اسلام آباد ٹریفک پولیس نے مجموعی طور پر 7 لاکھ 8 ہزار 325 ٹریفک چالان جاری کیے، جن کے ذریعے شہریوں سے 631.675 ملین روپے یعنی 63 کروڑ 16 لاکھ 75 ہزار روپے سے زائد کا بھاری جرمانہ وصول کر کے سرکاری خزانے میں جمع کرایا گیا۔ ذرائع کے مطابق سب سے زیادہ چالان اوور اسپیڈنگ، سگنل توڑنے، بغیر لائسنس ڈرائیونگ، بغیر ہیلمٹ موٹر سائیکل چلانے، دوران ڈرائیونگ موبائل فون کے استعمال، غلط پارکنگ اور کالے شیشوں والی گاڑیوں کے خلاف کیے گئے۔ ٹریفک پولیس حکام کا کہنا ہے کہ شہر میں سیف سٹی کیمروں اور ای چالان سسٹم کو مزید فعال کرنے کے بعد خلاف ورزیوں کی نشاندہی میں آسانی ہوئی ہے اور اب شہریوں کو گھر بیٹھے بھی ای چالان موصول ہو رہے ہیں، جس کی وجہ سے چالانوں کی تعداد میں نمایاں اضافہ ہوا ہے۔ حکام نے واضح کیا کہ ان کارروائیوں کا مقصد شہریوں کو تنگ کرنا نہیں بلکہ قیمتی جانوں کا تحفظ اور ٹریفک کے نظام کو بہتر بنانا ہے اور آئندہ بھی بلا امتیاز کارروائیاں جاری رہیں گی۔