نومبرآذربائیجان کی تاریخ کا عظیم اور یادگار دن رہے سفیر آزربائیجان8

اسلام آباد (ملک منظور احمد) آذربائیجان کے سفارت خانے کے زیر اہتمام 8 نومبر یومِ فتح کے موقع پر اسلام آباد کے مقامی ہوٹل میں ایک پروقار تقریب کا انعقاد کیا گیا، جس کی مہمانِ خصوصی وفاقی وزیر برائے انفارمیشن ٹیکنالوجی شیزہ فاطمہ خواجہ تھیں، جبکہ گیسٹ آف آنر لیفٹیننٹ جنرل سرفراز احمد، کمانڈر ایئر ڈیفنس پاکستان آرمی تھے۔ تقریب میں وفاقی وزرا، ارکانِ پارلیمنٹ، اہم سیاسی و سماجی شخصیات، سول و عسکری حکام اور مختلف ممالک کے سفیروں نے بڑی تعداد میں شرکت کی۔ تقریب میں آذربائیجان کی تاریخی فتح، شہدا کی قربانیوں اور پاکستان و آذربائیجان کے مضبوط برادرانہ تعلقات کو خراجِ تحسین پیش کیا گیا۔تقریب سے خطاب کرتے ہوئے آذربائیجان کے سفیر نے شرکا کا شکریہ ادا کرتے ہوئے کہا کہ 8 نومبر آذربائیجان کی تاریخ کا ایک عظیم اور یادگار دن ہے۔ یہ دن ان بہادر شہدا کی قربانیوں کی یاد دلاتا ہے جنہوں نے ملک کی آزادی، خودمختاری اور علاقائی سالمیت کے لیے اپنی جانوں کا نذرانہ پیش کیا۔ انہوں نے کہا کہ دوسری کاراباخ جنگ، جسے آذربائیجان حب الوطنی کی جنگ قرار دیتا ہے، کے نتیجے میں تقریبا 30 سال سے مقبوضہ آذربائیجانی علاقے آزاد ہوئے۔ اس تاریخی کامیابی کے نتیجے میں اقوام متحدہ کی سلامتی کونسل کی 1993 میں منظور کی گئی چار قراردادوں پر عملدرآمد ممکن ہوا۔آذربائیجان کے سفیر نے کہا کہ یہ عظیم فتح آذربائیجان کی مسلح افواج کی بہادری، سپریم کمانڈر اور صدر الہام علیوف کی سیاسی و عسکری قیادت اور آذربائیجانی عوام کے اتحاد کا نتیجہ تھی۔ شوشہ شہر کی آزادی کے دن 8 نومبر کو صدر الہام علیوف کے حکم پر یومِ فتح قرار دیا گیا۔ انہوں نے کہا کہ جنگ آذربائیجان کا انتخاب نہیں تھی بلکہ تقریبا تین دہائیوں تک تنازع کے پرامن حل کے لیے تمام سفارتی ذرائع استعمال کیے گئے، تاہم بین الاقوامی قوانین کو نظر انداز کرنے اور مزید علاقوں پر قبضے کی کوششوں کے باعث فوجی کارروائی ناگزیر ہو گئی۔سفیر نے اپنے خطاب میں مزید کہا کہ ہر جنگ کا اختتام امن پر ہونا چاہیے۔ حب الوطنی کی جنگ کے فوری بعد آذربائیجان نے آرمینیا کو امن معاہدے کی پیشکش کی تھی اور آج بھی آذربائیجان باہمی احترام، خودمختاری اور علاقائی سالمیت کے اصولوں کی بنیاد پر خطے میں پائیدار امن کے قیام کے لیے پرعزم ہے۔آزاد کرائے گئے علاقوں میں جاری تعمیرِ نو کے حوالے سے سفیر نے بتایا کہ ان علاقوں میں سڑکوں، پلوں، رہائشی بستیوں اور تاریخی و ثقافتی ورثے کی بحالی کا کام تیزی سے جاری ہے۔ آرمینیا کی جانب سے بچھائی گئی 10 لاکھ سے زائد بارودی سرنگوں کی صفائی بھی ایک بڑا چیلنج ہے۔ ان کا کہنا تھا کہ اب تک ایک لاکھ 20 ہزار سے زائد افراد اپنے تاریخی علاقوں میں واپس آباد ہو چکے ہیں، جو آذربائیجان کی تعمیرِ نو اور بحالی کے عزم کا واضح ثبوت ہے۔پاکستان اور آذربائیجان کے تعلقات کا ذکر کرتے ہوئے سفیر نے حکومتِ پاکستان اور پاکستانی عوام کا خصوصی شکریہ ادا کیا۔ انہوں نے کہا کہ مشکل وقت میں پاکستان نے جس سیاسی جرات اور سفارتی حکمت کا مظاہرہ کرتے ہوئے آذربائیجان کا ساتھ دیا، اسے آذربائیجانی عوام ہمیشہ یاد رکھیں گے۔ عالمی سطح پر دوہرے معیار کے باوجود پاکستان کی جانب سے حمایت دونوں ممالک کے درمیان اعتماد، اخلاص اور بھائی چارے کی مضبوط مثال ہے۔انہوں نے کہا کہ پاکستان اور آذربائیجان کے تعلقات اس وقت اپنی بلند ترین سطح پر ہیں۔ دونوں ممالک کے درمیان اعلی سطحی دوروں، دفاعی، عسکری اور تکنیکی شعبوں میں تعاون سمیت مختلف شعبوں میں تعلقات کو مزید وسعت دی جا رہی ہے۔ انہوں نے اسلام آباد میں آذربائیجان کے تعاون سے قائم ہونے والے آسان سروس اسلام آباد کو بھی دونوں ممالک کی دوستی اور باہمی تعاون کی ایک خوبصورت علامت قرار دیا۔تقریب میں شریک شخصیات نے بھی پاکستان اور آذربائیجان کے درمیان دیرینہ دوستانہ تعلقات، مشترکہ مفادات اور مختلف شعبوں میں تعاون کو مزید فروغ دینے کی اہمیت پر زور دیا۔ تقریب کا اختتام پاکستان اور آذربائیجان کے قومی ترانوں، دونوں ممالک کی دوستی اور بھائی چارے کے نعروں کے ساتھ ہوا۔ آذربائیجان کے سفیر نے اپنے خطاب کے اختتام پر پاکستان اور آذربائیجان کی دوستی زندہ باد کا نعرہ لگاتے ہوئے دونوں ممالک کے درمیان مضبوط تعلقات کو مزید مستحکم بنانے کے عزم کا اظہار کیا۔جمہوریہ آذربائیجان کے یومِ فتح کی چھٹی سالگرہ کے موقع پر منعقدہ استقبالیہ میں وفاقی وزیر برائے انفارمیشن ٹیکنالوجی و ٹیلی کمیونیکیشن، شازہ فاطمہ خواجہ، پاکستان میں جمہوریہ آذربائیجان کے سفیر عرفان دادوف اور دیگر افراد کی گروپ تصویر۔