معدنی وسائل کی مقامی سطح پر پروسیسنگ’ ویلیو ایڈیشن کو فروغ دینگے’وزیراعلیٰ سندھ

کراچی (این این آئی) وزیراعلیٰ سندھ سید مراد علی شاہ نے صوبے میں معدنی وسائل کی تلاش، جدید کان کنی، پروسیسنگ اور برآمدی صنعتوں کے فروغ کے لیے ملکی و غیر ملکی سرمایہ کاروں کو سرمایہ کاری کی دعوت دیتے ہوئے کہا ہے کہ معدنی شعبے میں شفاف قوانین، مسابقتی مراعات اور سازگار ماحول فراہم کیا جائے گا۔ کان کنی کے منصوبوں میں مقامی افراد کو روزگار کی فراہمی اور متاثرہ علاقوں کی بحالی پر بھی خصوصی توجہ دی جائے گی۔وزیراعلیٰ سندھ کی زیر صدارت معدنی وسائل کی استعداد اور سرمایہ کاری کے مواقع سے متعلق اجلاس منعقد ہوا، جس میں وزیر معدنیات سید سردار علی شاہ، پرنسپل سیکریٹری آغا واصف، سیکریٹری توانائی شہاب انصاری، سیکریٹری معدنیات سہیل بلوچ اور اسپیشل سیکریٹری توانائی اسلم سومرو نے شرکت کی۔اجلاس سے خطاب کرتے ہوئے مراد علی شاہ نے کہا کہ سندھ کے معدنی وسائل معاشی ترقی، صنعتی فروغ اور روزگار کے نئے مواقع پیدا کرنے کی بھرپور صلاحیت رکھتے ہیں۔ صوبے میں کوئلے اور دیگر معدنیات کے شعبوں میں سرمایہ کاری کے وسیع امکانات موجود ہیں، تاہم خام معدنیات برآمد کرنے کے بجائے مقامی سطح پر پروسیسنگ اور ویلیو ایڈیشن کے ذریعے صنعتوں کے قیام پر توجہ دینا ہوگی۔