سندھ حکومت کا آبادگاروں کیلئے 17 ارب روپے سبسڈی کا اعلان

کراچی (این این آئی) سندھ حکومت نے ربیع سیزن کے لیے آبادگاروں کو 17 ارب روپے کی سبسڈی فراہم کرنے کا فیصلہ کیا ہے، جس کے تحت سبسڈی کی فراہمی کا آغاز 20 نومبر سے ہوگا۔ چیئرمین پاکستان پیپلزپارٹی بلاول بھٹو زرداری وزیراعلیٰ ہاؤس میں سندھ ویٹ گروورز سپورٹ پروگرام کے تحت آبادگاروں میں سبسڈی کی رقم کی فراہمی کا افتتاح کریں گے۔صوبائی وزیر زراعت سردار محمد بخش خان مہر نے بتایا کہ اس سلسلے میں وزیراعلیٰ ہاؤس میں تقریب منعقد ہوگی، جس میں وزیراعلیٰ سندھ، صوبائی وزراء ، اراکین سندھ اسمبلی اور پارٹی رہنما شرکت کریں گے۔اس حوالے سے وزیر زراعت سندھ سردار محمد بخش خان مہر کی زیر صدارت اہم اجلاس منعقد ہوا، جس میں آبادگاروں کی رجسٹریشن اور سبسڈی کی فراہمی کی افتتاحی تقریب کی تیاریوں کا جائزہ لیا گیا۔ اجلاس میں سیکریٹری زراعت محمد زمان ناریجو نے رجسٹریشن کے عمل اور تقریب کے انتظامات سے متعلق بریفنگ دی۔سردار محمد بخش خان مہر کے مطابق رواں ربیع سیزن میں بینظیر ہاری کارڈ کے ذریعے ساڑھے پانچ لاکھ آبادگار مستفید ہوں گے، جبکہ سندھ ویٹ گروورز سپورٹ پروگرام کے تحت مجموعی طور پر 17 ارب روپے کی سبسڈی مختص کی گئی ہے۔