اسلام آباد (صباح نیوز) الیکشن 2018 کی انتخابی سرگرمیوں پر 7دن میں 4دہشت گرد حملے ہوچکے ہیں جن میں122 سے زائد افراد جاں بحق اور 127سے زائد زخمی ہوئے ہیں۔پاکستان میں الیکشن 2018 میں صرف 12دن باقی ہیں،ایک طرف انتخابی مہم زور و شور سے جاری ہے ،وہیں دہشت گردی کا سلسلہ بھی شروع ہوچکا ہے ۔ان سات دنوں میں بنوں میں دو حملے ہوئے جبکہ ایک ایک دھماکا پشاور اور مستونگ میں ہوا ہے،ان دھماکوں میں 2امیدوار بھی جان کی باز ہار چکے ہیں۔سات جولائی کو بنوں کے علاقے تخت بھائی میں ایم ایم اے کے امیدوار ملک شیریں کے قافلے میں بم دھماکا ہوا تھا جس میں امیدوار سمیت 7افراد زخمی ہوئے تھے ۔دس جولائی کو پشاور کے علاقے یکہ توت میں اے این پی کے انتخابی جلسے میں خود کش حملہ ہوا جس میں ہارون بلور سمیت 22افراد جان کی بازی ہار گئے جبکہ 60 زخمی بھی ہوئے ۔ 13جولائی کو بنون اور مستونگ میں دھماکے ہوئے ،پہلا حملہ ایم ایم امیدوار اکرم درانی کے انتخابی قافلے پر ہوا جس میں 4افراد جاں بحق 13زخمی ہوئے ۔شام کو بلوچستان کے ضلع مستونگ کے علاقے درین گڑھ میں بلوچستان عوامی پارٹی کے امیدوار سراج رئیسانی کے انتخابی قافلے پر حملہ ہوا جس میں رئیسانی سمیت 40افراد جان کی بازی ہار گئے ،حملے میں 60سے زائد افراد زخمی بھی ہوئے ہیں۔
انتخابی سرگرمیوں کے 7 دن میں 4 دہشتگرد حملے ، 122 جاں بحق
