لاہور(آئی این پی)پاکستان کرکٹ بورڈ(پی سی بی) کے نئے چیئرمین کے انتخاب کےلئے الیکشن آج لاہور میں ہو گا۔ وزیر اعظم عمران خان کی جانب سے نامزد چیئرمین پی سی بی احسان مانی نے کاغذات نامزدگی جمع کروادیئے۔ الیکشن کمشنر افضل حیدر اور ڈپٹی الیکشن کمشنر احمد شہزاد فاروق رانا الیکشن کا انعقاد کریں گے۔ الیکشن میں گورننگ بورڈ کے رکن احسان مانی آسانی سے نئے چیئرمین پی سی بی منتخب ہوجائیں گے۔ ان کو ممبران کی اکثریت کی مکمل حمایت حاصل ہے ۔بورڈ آف گورنر کے کسی دوسرے رکن نے ابھی تک کاغذات نامزدگی جمع نہیں کروائے ،کاغذات نامزدگی آج 11:30 بجے تک جمع کروائے جا سکتے ہیں ،جس کے بعد اسی وقت سکرونٹی کرکے الیکشن کروائے جائیں گے اور چیئرمین پی سی بی کے نام کا اعلان کر دیا جائے گا۔دن ایک بجے امیدواروں کی حتمی فہرست جاری کی جائے گی جبکہ ڈیڑھ بجے چیئرمین پی سی بی کیلئے الیکشن ہو گا۔ پی سی بی بورڈ آف گورنرز میں وزیر اعظم اور پیٹرن انچیف پی سی بی عمران خان کے نامزد کردہ ممبرز احسان مانی اور اسد علی خان، لیفٹیننٹ جنرل (ر)مزمل حسین( واپڈا)، ڈاکٹر نجیب صائم (ایچ بی ایل)، محمد ایاز بٹ کے آر ایل، لیفٹیننٹ جنرل (ر)جاوید ضیا(ایس ایس جی سی)، مراد اسماعیل(کوئٹہ ریجن)، شاہ ریز عبداللہ روکھڑی(لاہور ریجن)، کبیر احمد خان(فاٹا ریجن)، کیپٹن (ر)جہانزیب خان (سیکرٹری وزارت برائے بین الصوبائی رابطہ)شامل ہیں۔یاد رہے کہ سیکرٹری گورننگ بورڈ میں شامل ہونے کے باوجود ووٹ دینے کا استحقاق نہیں رکھتا۔۔پی سی بی کے نئے چیئرمین کا عہدہ سابق چیئرمین نجم سیٹھی کی طرف سے استعفی دینے سے خالی ہوا تھا ۔ ۔واضح رہے پاکستان کرکٹ بورڈ کے گورننگ بورڈ کے ممبرز کی تعداد 10 ہے جس میں دو براہ راست وزیراعظم یعنی پی سی بی کا پیٹرن مقرر کرتا ہے جب کہ دیگر 8 ریجنز اور ڈپارٹمنٹ کی جانب سے منتخب ہوکر بورڈ کا حصہ بنتے ہیں۔
