دبئی (اے پی پی) پاکستان کی انٹرنیشنل کرکٹ کونسل (آئی سی سی) کی تازہ ترین عالمی درجہ بندی میں ٹاپ پوزیشن پر حکمرانی برقرار ہے، بلے بازوں میں بابر اعظم، باﺅلرز میں راشد خان اور آل راﺅنڈرز میں گلین میکسویل بدستور سرفہرست ہیں، بھارتی سپنر کلدیپ یادیو اور آسٹریلیا کے ایڈم زمپا 20 اور 17 درجے لمبی چھلانگ لگا کر ٹاپ فائیو باﺅلرز میں شامل ہو گئے۔ آئی سی سی کی طرف سے جاری کردہ تازہ ترین ٹی ٹونٹی رینکنگ کے تحت پاکستانی ٹیم 138 پوائنٹس کے ساتھ پہلے نمبر پر براجمان ہے، بھارتی ٹیم کی ریٹنگ میں ایک پوائنٹس کی کمی ہوئی ہے تاہم اس کے باوجود اس کا دوسرا نمبر برقرار ہے، آسٹریلوی ٹیم بھارت کے خلاف سیریز برابر کھیل کر ایک درجہ تنزلی کے بعد چوتھے نمبر پر چلی گئی اور اس کی جگہ انگلینڈ نے تیسری پوزیشن سنبھال لی، جنوبی افریقن ٹیم پانچویں نمبر پر ہے، بلے بازوں میں بابر اعظم سرفہرست ہیں، ایرون فنچ ایک درجہ تنزلی کے بعد تیسرے نمبر پر چلے گئے، ان کی جگہ کولن منرو نے دوسری پوزیشن سنبھال لی، فخر زمان ایک سیڑھی چڑھ کر چوتھے نمبر پر آ گئے، میکسویل بھی ایک درجہ بہتری پا کر پانچویں نمبر پر پہنچ گئے، روہت شرما 2 درجے تنزلی کے بعد نویں نمبر پر چلے گئے، کوہلی کا 14واں نمبر برقرار ہے، باﺅلرز میں راشد خان سرفہرست ہیں اور شاداب خان کا دوسرا نمبر برقرار ہے، بھارتی سپنر کلدیپ یادیو 20 اور آسٹریلوی سپنر ایڈم زمپا 17 درجے لمبی چھلانگ لگا کر بالترتیت تیسرے اور پانچویں نمبر پر آ گئے، اینڈریو ٹائی 8 درجے تنزلی کے بعد ٹاپ ٹین سے باہر ہو گئے، وہ 18ویں نمبر پر ہیں۔
ٹی 20رینکنگ: پاکستان کی بادشاہت برقرار
