پاکستان نے نئی دہلی حکومت کی جانب سے بھارتی فضائیہ کے پائلٹ ابھی نندن کو تیسرے سب سے بڑے فوجی اعزاز دینے پر کہا ہے کہ بھارتی جعلسازی اورفرضی قصے کہانیوں کی ایک بہترین مثال ہے جس کا مقصد اپنے عوام کو خوش کرنا ہے۔
بھاتی اخبار ’دی انڈین ایکسپریس‘ کے مطابق ابھی نندن نے ویر چکرا وصول کیا، یہ بھارتی فوج کا تیسرا اعلیٰ سطح کا اعزاز ہے، جبکہ پہلے نمبر پر پرم ویر چکرا اور دوسرے نمبر پر ماہا چکرا ہے۔
ویر چکر پرم ویر چکر اور مہا چکرا کے بعد جنگ کے وقت ہندوستان کا تیسرا سب سے بڑا بہادری ایوارڈ ہے۔
رپورٹ کے مطابق ابھی نندن کو حال ہی میں ونگ کمانڈر سے گروپ کیپٹن کے عہدے پر ترقی دی گئی ہے انہیں ’جرأت مندی کے مظاہرے‘ پر اس اعزاز سے نوازا گیا۔
بھارت کے مطابق انہوں نے پاکستانی فوجی طیارہ ایف 16 گرایا تھا جسے پاکستان، آزاد مبصرین اور بین الاقوامی میڈیا کی جانب سے حقیقت کے برعکس قرار دیا گیا ہے۔
ابھی نندن کو بھارتی صدر رام ناتھ کووند کی جانب سے ویر چکرا میڈل دیے جانے کے بعد جاری کردہ ایک بیان میں دفتر خارجہ نے کہا کہ یہ اقدام (بھارت) کو اپنی شرمندگی چھپانے کے لیے کرنا پڑا۔
دفتر خارجہ نے ایک مرتبہ پھر بھارتی دعویٰ مسترد کیا کہ ابھی نندن نے فروری 2019 میں آزاد جموں کشمیر میں گرفتاری سے قبل ایک پاکستانی جنگی طیارہ ایف 16مار گرایا تھا۔
دفتر خارجہ کے ترجمان عاصم افتخار نے کہا کہ امریکی حکام سمیت عالمی ماہرین پہلے ہی واضح کرچکے ہیں کہ پاکستان ایف 16 طیاروں کی تعداد مکمل ہے اور کوئی طیارہ تباہ نہیں کیا گیا۔
