لاہور: (ویب ڈیسک) پاکستان سپر لیگ (پی ایس ایل) کے ساتویں ایڈیشن میں کورونا ایس او پیز باپ بیٹی کی لازوال محبت کے درمیان حائل ہوگئیں، سٹار آل راؤنڈر شاہد آفریدی نے افسردگی کے عالم میں بیان جاری کردیا۔
واضح رہے کہ شاہد آفریدی پی ایس ایل کے آغاز پر ہی کرونا وائرس کا شکار ہوئے تھے جس کے باعث وہ ابتدائی دو میچوں میں شریک نہ ہوسکے تھے۔
دوسری طرف شاہد آفریدی اور ان کی بیٹی لاہور میں ایک ہی ہوٹل میں موجود ہونے کے باوجود ملاقات نہیں کرسکتے کیونکہ کورونا ایس او پیز کے تحت کھلاڑی کو بائیو سیکیور ببل سے باہر جانے کی اجازت نہیں ہے۔
کورونا پابندیاں باپ بیٹی کی ملاقات میں حائل تو ہوئیں مگر لازوال رشتے کی محبت کمرے کے آنکھ نے قید کرلی، جسے خود شاہد آفریدی نے اپنے آفیشل ٹوئٹر ہینڈل سے وائرل کردیا ہے۔
شاہد آفریدی نے لکھا کہ میں اپنی چھوٹی بیٹی کو بہت یاد کر رہا ہوں، ہم ایک ہی ہوٹل میں ہیں لیکن بائیو ببل پروٹوکولز کی وجہ سے مل نہیں سکتا۔
ویڈیو میں دیکھا جاسکتا ہے کہ شاہد آفریدی کی چھوٹی بیٹی نے کھڑکی سے اپنے والد کو تجسس بھری نگاہوں سے دیکھا اور ‘بابابابا’ کی آوازیں لگائیں، جبکہ شاہد آفریدی نے بیٹی کو دیکھ کر ہاتھ ہلایا اور پیغام میں لکھا کہ میری چھوٹی شہزادی جلد ہی ہماری ملاقات ہوگی۔
