واٹس ایپ صارفین اب چیٹ میں ‘اوریجنل کوالٹی’ کی تصاویر بھیج سکیں گے

مینلو پارک: (ویب ڈیسک) واٹس ایپ انتظامیہ نے سال 2023ء کے اہم ترین فیچر پر کام شروع کردیا جس سے واٹس ایپ صارفین چیٹ میں ‘اوریجنل کوالٹی’ کی تصاویر بھیج سکیں گے۔
صارفین کی ضرورت اور مطالبے کو مدنظر رکھتے ہوئے واٹس ایپ کی جانب سے یہ اپ ڈیٹ رواں سال کی سب سے بڑی اپ ڈیٹس میں سے ایک ہوگی کیونکہ اعلیٰ معیار کی تصاویر وقت کی اہم ضرورت بن چکی ہیں۔
اس حوالے سے واٹس ایپ بیٹا نے ایک سکرین شاٹ بھی جاری کیا ہے جس میں تصویر کے معیار کا آئیکن ڈرائنگ اور دیگر ٹولز کے ساتھ موجود ہے، اس آئیکن کی مدد سے واٹس ایپ صارفین تصاویر بھیجنے سے پہلے اس کی کوالٹی کا انتخاب کر سکیں گے کہ تصویر لو کوالٹی میں بھیجنی ہے یا اوریجنل کوالٹی میں۔
جہاں اس نئے فیچر کا فائدہ ہے وہاں ایک نقصان بھی ہے، اوریجنل کوالٹی میں تصویر بھیجنے سے صارفین کا بہت زیادہ ڈیٹا استعمال ہوگا، اور موبائل سٹوریج پر بھی اضافی بوجھ پڑے گا، انتظامیہ نے یہ فیچر جلد صارفین کے لئے پیش کرنے کا اعلان کیا ہے۔